今個星期四12月20號係澳門回歸八周年紀念日，澳門民主派發起澳門首次「回歸民主大遊行」，打正旗號反貪腐、爭民主、保民生。雖然澳門民主派人丁單薄，遊行人數肯定冇香港咁有睇頭，不過特首鏵哥都不敢輕視，豪花600萬元搞咗個萬人演唱會同遊行打對台，想引誘市民轉軚聽concert唔上街，試圖用歌聲掩蓋民怨。
紅星演出回歸騷
八方收到風，呢個喺澳門運動場舉行嘅慶回歸大騷星光熠熠，搵咗成10個紅星撐場，包括阿Lam、Sammi、克勤、Eason、千嬅、許志安、衞蘭、何韻詩、張敬軒，賭王個女何超當然唔少得，仲有國家奧運金牌運動員演出，演唱會司儀係森美、小儀。
鏵哥今勻擺明賣大包吸人入場，事關呢個鑽石陣容大騷門票每張只賣100蚊，拎住澳門身份證仲半價㖭，頭100個購票者會獲贈上述其中一位歌星簽名唱片，所有入場觀眾則有大抽獎，頭獎係一架房車！澳門民主起動召集人利健潤同八方講，據知6,000張公開發售門票一個上午沽清，由於演唱會星期四下晝兩點開始，大遊行一點半集合，三點鐘起步，兩個活動撞到正，澳門政府擺明搶客唔想咁多人遊行，睇牌面已少咗6,000人上街。
圖壓低遊行人數
有澳門人同八方講，雖然唔少知識分子、中產階級對澳門官商勾結、貪污問題睇唔過眼，不過呢班人多數係專業人士或公務員，通常唔會亦唔敢貿然上街，所以遊行人數多極有限，鏵哥竟然主動出擊壓低遊行人數，反映佢好棹忌街頭活動衝擊管治威信，「總之越少人上街越好，否則鏵哥唔知點向北京交代。」
你有張良計，我有過牆梯，買咗飛睇演唱會又想遊行嘅，利健潤話今日可以預先上街，亦可以當係星期四遊行嘅「熱身」，民主起動同民生協進會搶先發起「反貪污、反惡法、反道路交通法」電單車慢駛大遊行，今日下午兩點喺祐漢三角花園出發，終點係澳門政府總部。