「嚟到聖誕，OceanPark有乜嘢玩？One，冰雕王國，仲有好多飄雪FallingDown...」半中半英音韻唔準卻出奇吸引的海洋公園廣告歌，力谷聖誕3大必殺技——冰雕王國、溜冰百老匯及飛天大聖誕樹。聖誕要有氣氛，白雪聖誕永遠係夢想。冰雕王國順理成章變第一主打，不停唱出FallingDown口號。但類似冰雕玩意，香港都搞過不少。經預覽一日遊後發現，世界溜冰高手的百老匯表演先至係精采主菜。
記者︰陸俊雄
攝影︰陳盛臣
Model︰Sakura、Ivan@PureModel
百老匯美女溜冰
為增加氣氛，今年海洋公園大搞冰雪王國，每個人都將焦點放落冰雕之上，其實另一重頭戲冰上百老匯表演先係最精采的主菜。位於大樹灣廣場，首次Setup一個溜冰表演場，一次過容納1,000名觀眾；更首次請來全球9個不同國家的頂尖溜冰好手，包括捷克和美國等。拋高掉低、飛來飛去的冰上飄移，固然有睇頭；穿紅色舞衣的女主角特別漂亮，欣賞美女都係主打推介環節。而負責監督和舞蹈編排的，是效力拉斯維加斯RandEnterprisesandProductions的資深溜冰高手JebRand和BillyChapel。表演大概可分為7個段落，由全白的服飾，慢慢再由七彩演變到全紅盛舞，迎接聖誕老人出場，聖誕氣氛一流。
40呎高聖誕樹
在香港想看40呎高的聖誕樹絕不容易，大樹灣廣場上，經過數十米上空滿天星的燈飾長廊，就看到那40呎高的聖誕樹。拍攝當日，聖誕老人、精靈和冰雪女王等，通通在大樹下報到。但聽說在正式開幕時，更有身穿薄絲的聖誕仙子在聖誕樹範圍，凌空旋轉飛舞。雖然今回聖誕項目集中在大樹灣，但其實山下纜車廣場上亦有一個環球聖誕村，內有很多精靈出現，還有一隻在玻璃立方體內耍雜技。
40個冰雕陪你玩
雖然冰雕飄雪年年有人搞，但想過白色聖誕都係香港人的夢想，所以點會唔吸引。海洋公園的冰雪王國，將佈滿40個人手雕琢而成的冰雕，角色包括胡桃夾子、薑餅人和聖誕鹿等。可惜記者預覽當日，因為還在佈置中，只能見到多隻戴上頸巾的聖誕鹿。至於胡桃夾子等雕成怎樣，仍然是一個謎。如果未曾到過哈爾濱看冰雕的，更加要來看個究竟。加埋場內不停噴雪，有雪玩有冰雕睇，大人細路都會一樣難忘。不過要提醒大家，室溫如雪房，記得穿上大會預備好的羽絨先入場，大家有定心理準備會過凍到入骨的聖誕！
必買聖誕精品
既然已花錢入海洋公園，買點精品送禮或自用都少不免。聖誕期間，更會推出大量新款毛公仔和精品，好像聖誕音樂搖鹿、扮聖誕老人的海龜，及充滿聖誕氣氛的盈盈樂樂。買一隻放在家中那小小的聖誕樹身旁，應節一番。
海洋公園聖誕全城hohoho2007
日期︰現在至2008年1月1日
時間︰9:30am-8:00pm
查詢︰25520291
門票︰成人$208；小童（3至11歲）$103
*冰上百老匯表演時間︰
星期一至五︰12:00pm、2:00pm、4:00pm及5:15pm
星期六、日及公眾假期︰12:00pm、2:00pm、3:30pm、5:15pm及7:00pm