年屆47歲嘅齊秦自從02年同王祖賢分手後，感情似乎冇着落，但原來佢3年前開始秘密同一位細佢24年、喺深圳學音樂嘅女仔雅雅交往，前晚，佢同胞姊齊豫等一班歌手喺上海舉行完「原曲原唱校園歌曲30年經典演唱會」之後，出席慶功宴時雅雅先至首度曝光。
猶如女主人
今年23歲、貌似吳綺莉嘅雅雅，喺慶功宴上好似齊太咁幫手招呼客人，又好細心咁幫男友整理衣衫，而佢頸後面仲有個紅色嘅「齊」字古字紋身，亦即係齊秦公司嘅logo，擺明喺度宣示主權。原來，5年前齊秦喺深圳見到雅雅已經動心，但雅雅前晚話頭兩年同齊秦唔過電，後來發覺佢好似細路仔同需要人照顧，佢哋先開始喺埋一齊。聽講佢哋已經喺北京築愛巢，問到幾時生仔，雅雅就話：「他已經夠老了吧？明年想幫他生個小孩。」