蘇永康錯，02年30幾歲人還發生搖頭丸事件，演藝事業一鋪清袋，他怎不自嘲是個「笨×」？引火自焚，後果自負：星途仆直5年，又離婚又患抑鬱症，低潮到不能，差不多被判即時死亡。
以為「待斃」，但柳暗花明又一村。
徐濠縈做了紅娘，為他帶來另一個春天；有經理人黃柏高力撐，死不認輸的康仔明年死灰復燃，趁4月復活節回歸，在港開騷博翻身。「我冇懷疑過自己就咁收皮！」蘇永康說得自信。
是的，娛樂圈從來有賭未為輸，但他手上還有多少籌碼？ 撰文：朱倬誼
勒戒．離婚．抑鬱
看到不知重播了多少回的《妙手仁心》，劇中那位惹人憐惜的愛滋病患者「阿嬌」，還有插曲《越吻越傷心》，都是蘇永康的成就。一念天堂，一念地獄，搖頭丸事件、被前妻數臭，令他徘徊地獄邊緣。
當年康仔35歲還來搖頭這套，有冇搞錯？太多人說他抵死、從此玩完。這天他坐在尖沙嘴的餐廳裏，回想前事，他只會自嘲是個「笨×」：「一個字，笨！其實我想加個字，但個字唔出得街。呢件事當然係自己責任，點知成為亞洲新聞，我唔想賴，你點賴都唔應該做，你咪飲酒醉死佢囉，唔合法嘅做嚟做乜呢？butsorry，Ididthat。最正確方法係面對問題，唔好避，法律要承擔，我承擔。」
「唔應該咁輸」
03、04年，康仔黑開有條路。接受勒戒後，事業低潮、離婚、患抑鬱症，一條龍衰到貼地，還幸未致悲觀到想死。他說：「太多嘢放唔低啦，同埋由我出事開始，我冇懷疑過自己就咁收皮。我唔心死，我唔認輸，唔應該咁樣輸，我係咬實牙根，有班兄弟支持，上天都唔係對我太差。事情過後，我感恩上天畀我呢啲波折，如果唔係我唔識得珍惜𠵱家嘅一切，亦唔識得日日走過隔籬房，摸摸我阿媽塊面。」
蜚短流長，都是自招，康仔無奈但接受，「我明，鬼叫你之前唔生性、離婚，之前你賴過嘢，咪將離婚linkup一齊，傳我經濟有問題、死撐、死霸前妻共同擁有間屋，但我最唔開心係影響到我阿媽。嗰輪我阿媽使多咗錢，出街買餸係佢嘅節目，嗰時我住淺水灣，阿媽搭巴士出去有幾奇啫？嗰輪佢全部搭的士，佢唔想俾人話我阿媽搭巴士，我就揸波子。」
04年康仔避走內地發展，思想過濾後，發覺沉下去無補於事，橫死掂死，不如上戰場博多鋪。他說：「我要有目標同健康嘅身體，冇健康又點劈落去？我好多嘢放唔低，我阿媽、我棚兄弟，我唔怕死，我唔想病，我必須承認自己係姣婆四，我鍾意着DiorHomme，男人過40關口必須keep，你睇阿Dick（張衞健）、梁炳（梁漢文）都有肚腩，Aaron（郭富城）六粒（腹肌）仲喺度，我選擇運動抒發情緒。其實人生好靚，我一路keep住運動到𠵱家，有時係一念之差，一件事可以從正反面去睇，我選擇從正面睇，咁我人生仲要過㗎。」
「我冇生疏到」
康仔被逐邊疆，儘管人人都說救他嘥氣，有幸伯樂未忘情，經理人黃柏高（Paco）力排眾議，撐他明年捲土重來，再出廣東碟及在StarHall舉行至少六場的演唱會。相隔五年再踏香港舞台，康仔說他不擔心票房：「台北演唱會係小試牛刀，呢幾年我跑遍大江南北，乜場都唱過，我冇生疏到，拿揑現場觀眾互動嘅效果更趨成熟，磨利咗把刀，不如畀我喺香港試一試，我唔擔心票房，唔係過份自信，我覺得蘇永康嘅基本層會喺度。」
「越問越傷心，明明無餘地再過問……」——《越吻越傷心》
覓新歡拒做老襯
近年蘇永康身邊多了一位長髮女伴，上月她陪着72歲的蘇媽媽遠赴台北看康仔演唱會，親密關係不言而喻。康仔說和她拍拖兩年了，感情穩定，邂逅她其實多得老友徐濠縈好介紹。
一朝被蛇咬，十年怕草繩，康仔經歷過婚姻失敗，再婚對他而言，暫時咪搞，他說：「neversaynever，但唔諗結婚住，大家都有共識。未遇到佢之前，雖然我發生咗事，但好笑，好人當我壞人，壞人當我自己人，實情我係老襯。即係當我認識啲正經女仔，人哋當我壞人，認識一啲曳曳嘅女仔，佢以為我真係咁曳，實情我又唔係嗰個程度。要搵個正經女仔，要接受你過去又要了解，唔容易，點知咁幸運俾我遇到，佢係阿徐（徐濠縈）啲friend嚟嘅，容許我有啲保留啦。喂！結婚又開記者會，離婚又開記者會，好驚㗎，大佬！」
與前妻因了解分手
康仔和新加坡籍前妻馮麗青（Jane）至今離婚四年，這段失敗婚姻令他學會很多，康仔說：「搖頭丸事件係自己衰，婚姻問題係兩隻手掌拍唔響，但冇呢段錯誤婚姻，我唔了解我自己，錯誤當中成長係好痛苦，亦唔可以重蹈覆轍，唔好再有人為錯誤。
「我98年3月識Jane，99年9月27號結婚，年半，及至今日我覺得雙方了解透澈要三年時間，因為人會下意識掩飾自己性格嘅陰暗面、性格嘅壞處，大家了解唔夠深，結婚後先發現生活上有差距，但仍然感謝佢放低所有嘢，佢融入唔到香港嘅社會係最大問題，我哋都幾經努力，但都係失敗咗。」
「情來自有方，只要仍祈望，天邊海角互不相干也戀上……」——《情來自有方》
論盡圈中老友
蘇永康紅過衰過𤓓過，但出了名是個孝順仔，對朋友有情有義；巧合的是，他的四位圈中老友一擔擔，同樣孝順但又各自上完天堂再跌谷底：謝霆鋒衰頂包、許志安衰借舊愛鄭秀文宣傳、張衞健錯打內地演員王伯昭、梁漢文欠債被拖車，要康仔論盡老友，實在有趣。
鋒芝負負得正
「兩個喪標（霆鋒、張栢芝）行埋一齊，變咗負負得個正，𠵱家加埋Lucas，霆鋒生性咗、顧家晒，謝霆鋒應該一早結婚，有家庭會令佢有責任感。衰妹（栢芝）係為愛情放棄一切嗰隻人，都係發仔瘟㗎啦，發到啦！一索得個男。霆鋒以前火爆因為細個，因為rockstar吖嘛──自己話自己係。何超都係㗎，奶茶事件唔係rockstar行為咩？黐線㗎，Sting夠rockstar咯，你唔好見佢『吽』記者？嗰時大家都後生，但隨住年齡同閱歷增長，成熟起嚟啦。」
梁炳餓佢唔死
「人生上佢有自己安排，工作上佢要選擇做創作路線，我佩服佢由唔識彈琴，到人人傳佢同老鼠不和，因為佢兩個唔去打波，梁炳係戒咗打波去練琴。創作歌手掌控比較難，有幾多個周杰倫吓吓中至得㗎？要再努力啲，只要佢對自己有信心，對音樂有誠意，仲有路可走。梁炳餓唔死嘅，佢冇咁優勢嘅係，唔同我哋咁有內地市場，但佢啲歌喺華南沿岸都OK。」
健仔一塌糊塗
「王伯昭事件對佢嚟講係個人驚嚇，亦係經一事長一智，好多事情處理失當，𠵱家佢知點樣去處理。張衞健，我唔擔心嘅，佢已經將成個市場推向大中華，佢係好演員，我知佢嚟緊有好多動作，相信會推向佢另一個高峯，佢亦都知道點轉型，小子角色唔能夠再做。張衞健喺工作上絕對有主導，但喺個人生活上係一塌糊塗，連對襪擺喺邊都唔知。」
安仔互相扶持
「我覺得老鼠（許志安）當年嘅傳媒低潮，情況嚴重過我，所以我都提議老鼠你快啲出去拍戲啦，結果佢拍咗套劇集《深情密碼》過冷河。人生邊有一條直路？但我哋兩兄弟互相扶持，呢幾年係佢人生中比較唔順嘅時候，但許志安唔會冇錢使，尚算幸運，佢喺心理調適上冇我哋咁知道點做，因為我哋窮過、扒逆水上，佢唔算係，但我相信佢過得到，畀少少時間佢啦！」
「我信你愛過更加哭過笑過，錯過跌過也算個好傢伙……」——《老死》
