日前《蘋果》報道一宗地產商涉嫌霸地兼斬樹事件，新鴻基地產被馬灣居民踢爆，質疑珀麗灣第六期工程越位侵佔官地，仲亂堆泥頭監生壓死咗唔知幾多棵樹。新地對指控好緊張，即刻派人去睇，然後向《蘋果》澄清，佢哋冇斬過一棵樹。
新地公關誓神劈願，再三強調，冇一棵樹死喺新地手下，仲聲稱漁護署調查人員睇過，都搵唔到有樹被斬。正所謂死無對證，如果啲樹真係俾人斬咗，咁講乜都得啦。八方追問漁護署事件下文，新聞官語帶些少勞氣咁話，漁護署調查工作仲未完成，目前冇任何結論。言下之意，新地仲未洗脫嫌疑，公關咁講有可能老點傳媒，或者冇意識咁誤導公眾。