新城電台前晚在九展舉行「07樂壇新人大熱鬥」音樂會，當中以周柏豪和洪卓立最多fans，但洪卓立的歌迷卻挑起爭鬥，搞到兩幫人嘈交。Freeze出場時被噓，但一輪自摸熱舞後，看得一班學生觀眾由噓聲變嘩嘩聲。
新城請來組合SunBoy'z以師兄身份打頭陣表演，惜三人跳舞不夾又不齊。後來洪卓立出場唱陳奕迅的《演唱會》表現未如理想，其後輪到周柏豪彈鋼琴自彈自唱，其歌迷興奮得湧到台邊，洪卓立的歌迷眼紅並大叫偶像名字，又敲鑼打鼓嘈得人聽不到周柏豪的聲音，其時又有洪的歌迷用粗口大罵站立拍照的觀眾，一時間音樂會變得亂七八糟。
後來洪卓立再出場，輪到周柏豪歌迷反擊，湧上前大叫偶像名字，工作人員為怕兩幫歌迷大打出手，即將他們分開，後來周柏豪出場，洪卓立歌迷又吵起來。事後洪卓立表示歌迷一向很乖，他說：「可能佢哋開心得滯，我會向周柏豪saysorry。」周柏豪則謂以為敲鑼打鼓的是自己歌迷：「我彈鋼琴怕好dry，聽到咁嘈嘅鼓聲，多啲聲仲好。」完騷前洪卓立走到周柏豪面前說不好意思，兩人還搭膊合照。
林峯撞咪
現場以學生fans居多，Freeze自我介紹時慘被狂噓，後來她們再出場，主持阿Bob故意叫觀眾給她們掌聲鼓勵，但依然夾雜噓聲。到Freeze以性感打扮大跳撩人舞姿，自摸又瞓地後，學生即嘩聲連連。事後甄穎珊說：「少少噓聲唔緊要，後來冇再噓已經好安慰。」陳樂榣則說：「冇掟嘢已好開心，我唔介意，好多巨星出嚟都俾人掟嘢俾人噓。」至於林峯出場時，主持校咪不慎撞到林峯上顎，幾乎撞到其鼻子，林峯即痛苦地以手掩口，不能說話。
此外，林峯昨在柴灣舉行簽唱會，談到鼻翼生蛇的歐陽震華笑謂考慮整容，還表明要整到跟林峯一樣靚仔，林峯謂對此不生氣：「我呢啲係天生嘅，冇得整，都係得啖笑，但最好唔好再拎呢個話題講啦。」
採訪：駱華齡 攝影：陳俊強
