香港又少一個鑽石王老五，信置執行董事、百億家族生意接班人黃永光噚日結婚，佢同新娘子Charis選擇喺新西蘭旅遊天堂陶波湖（LakeTaupo）舉行婚禮，親家吳 係兒科醫生。黃永光月前一擲3,628萬元買咗個大潭陽明山莊極高層單位，可能係新婚愛巢。
黃永光今年29歲，父親係地產大好友、信置主席黃志祥，爺爺係新加坡大地主黃廷方。佢03年加入信置時做項目經理由低做起，05年做執董。佢雖然身為太子爺，不過收人工好克制，上年度董事酬金只得75萬元，比前一個年度81萬元減咗7%人工。
同佢喺工作上有接觸人士同八方講，黃永光性格隨和低調，對下屬唔錯，佢今年4月參加第三屆地鐵慈善競步賽，喺「地鐵主席邀請賽」中贏到亞軍。黃家重點栽培呢位長子嫡孫，今年10月佢同老竇拍住上以「天價」57億元投得惠福道地皮。
除咗學做生意，亦要學習建立政經人脈，中聯辦穿針引線、由多個富豪第二代組成嘅「香港菁英同學會」，黃永光係副主席之一，同其他富豪之子李民橋、霍啓剛等人打交道。