前九鐵署理行政總裁黎文熹噚日為佢本爆料新書《九天風雲》主持簽名會，一如出版社事先張揚，有前九鐵員工現身捧場。自言啱啱過渡成為港鐵員工嘅黃先生話，佢原本係九鐵油漆部員工，一直支持黎生，所以噚日特登由粉嶺出嚟沙田，排隊為攞黎生簽名咁話。
帶過膠相攞簽名
黃生帶咗張8R過膠大相嚟畀黎文熹簽名，張相係當日裂紋事件發生後，煲呔到車廠視察，同班員工影嘅大合照，相中人包括黎文熹同阿黃生自己。黃生話好多同事都支持黎文熹，所以當時有成3,000幾個員工聯署聲明，黃生當時亦有份簽。至於田二少，黃生就唔係咁認同，話田二少唔係嚟做嘢喎。
據八方現場觀察，黎文熹呢個喺沙田新城市廣場商務印書館舉行嘅簽名會，都吸引到約30幾個讀者嚟攞簽名，有啲仲同佢握手合照㖭。黎文熹同啲讀者講，其實今年初已經構思寫書，到2月落筆，8月已經完成初稿，但就特登等到兩鐵合併之後先推出，唔想影響合併喎。佢仲話，當初本書諗住叫《最漫長的九天》，因為事發嗰九日，畀佢嘅感覺真係好漫長，從未試過覺得時間過得咁慢。