繼譚詠麟94年假香港大球場舉行細細聲演唱會後，相隔13年，昨日終由歌神許冠傑（Sam）假大球場開大大聲演唱會，率領30,000名現場觀眾多次放聲高叫，由天光唱至天黑。雖然內容炒冷飯，但阿Sam仍竭力表演，戴假髮扮貓王，又穿印有已故九龍皇帝曾灶財塗鴉的舞衣夥性感辣妹跳舞，踏入黃昏的分貝踩界時段後，阿Sam更挑戰環保署，着觀眾繼續唱到冧樓！
譚詠麟是首位假香港大球場舉行個人演唱會的本地藝人，他於94年開騷時因受分貝限制，被迫調低聲音，故曾自嘲是細細聲演唱會。不過昨日許冠傑舉行的《許冠傑．香港大球場．LIVE》音樂會，由於開騷時間為下午3時，所以在全長四小時的個唱中，可與觀眾齊聲狂叫，可惜傳媒只能在場內採訪個多小時。
觀眾玩人浪
昨日阿Sam坐舞台上層打鼓出場，由於距離太遠，初時觀眾只聞其聲不見其人，要他大叫「我喺度呀」才發現其蹤影，但開場後半小時因米高峯出現問題，令聲音變得散亂，觀眾聽不清其歌聲，他換咪後才變回清晰，身穿閃片衣的阿Sam在台上說：「今日咁嘅場面，我咁大個仔都未見過，有成30,000人同自己一齊，等咗呢個機會20幾年。」接着阿Sam要求觀眾一起大叫「噓」，他笑說：「唔係好夠勁，加多幾錢肉緊，噓到沙頭角都聽到！」他又着大家玩人浪，氣氛不俗。
未接獲投訴
其後阿Sam獻唱多首首本名曲，但派絲巾、咀歌迷等環節均屬炒冷飯，造型方面除有招牌豹紋look外，尚有戴假髮穿軍服扮貓王，又披印有已故九龍皇帝曾灶財塗鴉的長褸，與一眾辣妹打扮的女舞蹈員合跳勁舞。至於嘉賓方面，包括阿Sam兩位囝囝、黃貫中和葉世榮等，而阿Sam介紹庾澄慶出場時，大讚對方是寶島貓王，庾澄慶即以不純正廣東話唱《天才與白癡》和《佛跳牆》，令人捧腹大笑，另一嘉賓許冠英表演完畢後，個唱未完結已即時離開，他說：「眼瞓呀。」但不少觀眾也提早離開。
至晚上7時個唱接近尾聲，大會即放煙花，阿Sam則挑戰環保署，於7時後分貝限制時段要觀眾再叫，他笑道：「我個人好貪心，你哋叫多次，我想連汁都撈埋！」他又自嘲無奈時辰到，唱最後一曲《浪子心聲》前說：「希望大家擘大喉嚨，最尾唱到冧樓！」但其實他曾一度偷雞超出分貝限制，但未接獲環保署投訴。
採訪：胡比、馬建華 攝影：仇志德
街訪：氣氛熱烈音響欠佳
許冠傑（阿Sam）昨日在大球場舉行演唱會，大部份入場fans都表示滿意，不過也有歌迷認為音響效果欠佳，又指阿Sam的中氣不足。
鄧先生：
我買200蚊飛，我畀60幾分啦，開頭半個鐘啲音響完全聽唔到，阿Sam講嘢都聽唔到，之後調校番先清楚咋，我以前從未睇過佢演唱會，氣氛真係好好。
黎太：
verygood呀，我以前次次都捧阿Sam場，今日要飲先早走，我買200蚊飛，係距離遠咗少少囉。
左小姐：
我畀100分，好好睇呀，音響同視覺效果都好滿意。
伍老太：我啲飛朋友送㗎，好好睇，不過佢始終唔夠以前唱得好，中氣冇咁好呀，不過我都聽得好清楚，睇都可以嘅。
陳先生：我買400蚊飛，睇就好好睇，歌都好聽，但我個位好側，睇到條頸好痛所以要早走。
採訪：馬建華 攝影：仇志德
掠水小八卦：兼賣新書 肉照吸引
歌神昨日在香港大球場開騷，現場門口當眼處除放置一部被噴上藍色豹紋圖案的開篷車作為展品外，又設小檔攤出售紀念品，包括新書《此時此處許冠傑》及其新碟，書中有許冠傑不同階段的相片，包括肌肉男時期及許家四兄弟珍藏合照等，平裝本特價$100元，精裝版則特價$300元。
