喺港島區補選輸咗畀陳太嘅葉劉淑儀，早排選舉過後即時賴地硬，話如果唔係民建聯嘅招牌影響佢獨立嘅形象，相信會攞到多啲中間票。據聞呢番話激嬲唔少民記中人，質疑葉太使唔使咁快反轉豬肚？
葉太似乎亦聞到北角等左派重地傳出嗰陣味，噚日急急落番兩茶匙砂糖落豬肚裏面，話多謝民建聯全力幫忙，仲講到明自己下年多數再喺港島出選，希望雙方繼續合作喎。
葉劉噚日喺商台節目《政好星期天》度話，明年再參選，壓力應該冇啱啱輸咗嗰次咁大，因為補選係同陳太「隻揪」，明年喺比例代表制下，唔係兩個只能活一個。不過，佢都直認有嘢要改善，例如好多人勸佢「謙虛啲、講嘢唔好好似窒人咁牙尖嘴利」；佢自己都係參選時先發現，原來戴黑超會畀人覺得好招積、着紅衫又會令人覺得好挑釁，可能以前啲新聞官驚得罪老細，所以唔敢講畀佢聽，搞到佢到近期先可以調整一吓自己咁話。
反口大讚民建聯
唔知係咪俾人話得多，葉太噚日亦一改近排埋怨民建聯幫倒忙嘅態度，喺節目中大讚民記喺選舉中幫咗自己好多，仲逐個數，話主席譚耀宗喺花車巡遊嗰日陪咗自己成日，蔡菜子就幫佢喺東區用福建幫拉票，連前主席曾鈺成都喺佢大廈樓下派單張，真係好感激。
明年選舉民記當然會派人參選，到時肯定係「田雞過河各顧各」；聲言會捲土重來嘅葉太講到明，希望可以盡量同民記合作。咁樣睇嚟，佢賣口乖一輪，都係想啲大哥大姐「大人不記小人過」，下年繼續射住射住。
希望明年再合作
雖然輸咗補選，但葉劉今年聖誕都算有番啲安慰，因為佢囡囡葉榮欣前日正式獲美國東岸某大學取錄，新學期正式成為大學生。講到囡囡修讀嘅科目，葉太以「好搞笑」形容，究竟讀乜咁搞笑？都係「數碼動漫設計」啫，冷門就冷門咗啲，但可能將來好似《史力加3》聯合導演許誠毅咁名成利就都唔定吖。
既然兩母女都放下心頭大石，都係時候要放假唞一唞。葉太計劃嚟緊聖誕同囡囡外遊，但相信都係去近近哋嘅廣州，因為嗰邊有個成80歲嘅舅父，一路好緊張佢嘅選情，就算輸咗都應該返去探吓親。