曾德成局長在立法會忽然批評新科議員陳方安生官生民生不分，然後行政會議召集人梁振英批評陳太「嘴尖面皮薄」，再講落去，唔知會唔會有人墮落到好似台灣教育部官員說話咁下流呢？大家收吓口啦，以前話佢係陳老太，𠵱家話佢「嘴尖面皮薄」，唔係幾好聽呀嗎？
據一張報紙講，曾局長聽陳太講「沒有民主那有民生」，心裏有氣，於是奮筆疾書，陳太一講完，佢就宣讀自己臨時寫好嘅講詞，罵陳太忽然民主，忽然民生。一位新聞界老兵，現已退休，在大學教新聞系，佢對左丁山講：「曾局長以前係總編輯之時，寫慣社論與短評，下筆千言，倚馬可待，嗰日在立法會梗係聽聽吓頂住道氣，主筆癮發作，立即寫番一段短評，還擊陳太，主筆癮發作之時，佢大概唔記得自己係局長身份。」咁講未必錯，其他啲局長，邊度有曾局長咁好中文程度呀，想寫都寫唔出啦。
講開忽然民主，忽然民生，好似係一條罪狀，其簡單邏輯係：你以前唔講民主民生，𠵱家忽然講，係唔係假啲呀？你冇可信性，講出嚟只係為搶選票！如果有人承認，係呀，我以前唔識講，唔敢講，現在就是為了選票大講特講，有乜唔得先。罵人者會唔會因此啞口無言呢？唔會嘅，佢哋咪搵另外藉口嚟罵人囉。
天水圍啲居民相信好歡迎社會人士忽然關注天水圍，馬時亨局長、張建宗局長以前有冇去過天水圍做騷呀？唔記得有噃。經傳媒廣泛報道天水圍悲劇，渲染之成為悲情城市之後，啲局長忽然關注天水圍；各界人士忽然在馬局長推動下，到天水圍視察，馬會忽然決定在天水圍設立電話投注中心。呢類「忽然」都唔知幾受歡迎，至少天水圍居民唔會反對，只怕係三分鐘熱度啫。任何人以前唔講民主，唔講民生，市民好應該歡迎佢哋忽然民主，忽然民生，最怕佢哋上位後，忽然失蹤，唔記得以前講過乜。如果梁振英忽然講民主，忽然講2012年雙普選，大家歡迎還來不及啦，做乜要鬧佢？