長假前夕市場氣氛例淡，加上近排缺乏焦點新盤，搞到一手市場交投疏落。近日仍然有成交嘅新盤唔多，其中信和喺荃灣嘅萬景峰算係其一，呢個盤呎價5900至6400蚊，仲有百零個單位待售，有興趣買一手樓嘅準買家，不妨趁周日去現樓睇吓，然後搭港鐵落尖沙嘴，提早感受聖誕氣氛。
吃喝玩樂度聖誕
尖沙嘴新世界中心同法國食品協會（Sopexa）合辦嘅「法式聖誕市集」，今日喺正門露天廣場舉行，除咗有熱情肯肯舞、法式爵士樂演奏等精采表演外，市集內設有十幾個美食小攤檔，各種傳統法國美食佳釀，包括鵝肝、朱古力、香脆薄餅、豐年佳釀等可以試食。
品嚐法國美食之餘，唔好錯過法式工作坊，星級廚師將示範正宗法國廚藝，更有品酒名家分享試酒心得。另外唔少得親子活動聖誕「橙」飾工作坊，小朋友可於商場內自製法國家庭嘅傳統聖誕裝飾品，帶番屋企留念，過一個充滿法國風情嘅周日。