有朋友心大心細想置業，無論買樓抑或租，我都叫她一定要考慮港島。「你睇今次補選，選民質素幾高就知道，落槌買港島樓，等於搵到優質大藍籌，短線未必及得上國企，但長揸肯定跑贏大市通脹。」
「買樓和買股，同一風險的投資工具喎。」另一個朋友說。「分別還是有的，像葉劉硬要跟陳太拍住上，認為她提出的民主發展方案跟民主派一樣。好彩，有十七萬多的港島選民沒有中迷煙落疊，絕不是羊牯。」
「港島人似乎中意扮中產。」我同意，扮嘢的中產確係面目可憎，之不過，「新界那些打橫行的鄉紳，區議會投票都要打打殺殺，出動14X搶票，唔投票就斬人全家。這樣的地區，一千蚊呎都住唔過，教壞細路。」咁，港島區咁大，住邊忽？
我早就剪低補選結果存檔，仔細分析過，最值得住的是觀龍附近的私樓。「你睇葉國謙狂風掃落葉贏了區議會八成五選票，但到補選，忽然湧出二千多票支持陳太，還贏凸葉劉227票。這些選民可愛又可敬，住近他們，人格都高尚10%。」然後呢，當然是貝沙灣，投票率高達七成，住戶以高投票率抗衡鐵票，絕非免費蛇宴和荔枝團的擁躉。「OK，推銷完好區，港島有冇住唔過的？」全港97個票站，葉劉僅僅贏陳太那13個，像和富、柏架山唔好諗，石澳海灘雖然靚，但狗比葉劉惡，可以剔除在置業名單外。