星期三買馬經之際，報販乘機推銷《壹週刊》，話今期有料爆。本來唔多注意「壹仔」嘅嘞，聽報販咁講，望多一眼，咦，封面見到柯大班，條標題「柯太：個女人係雞。」好激啫，識咗柯大班咁耐，唔睇唔得，立刻放低二十大元買番一本。
睇完全文，內容無非話柯大班有一位女朋友，似往來甚密，屬於懷疑婚外情一類，照計記者冇乜好寫。但係記者到和富中心柯大班住所一敲門，柯太竟然咁大反應，甚為委屈，記者就真係無端端發達，個古仔立即寫得成。做過周刊嘅都知道，假如柯太拒絕回應，禮貌而堅決地請記者唔好打擾家庭私隱，記者下筆就會艱難好多咯。柯太大概不堪記者刺激，畀記者引用一句：「個女人係雞！」於是成為封面人物！
賓架A打電話嚟講柯大班，問左丁山睇咗《壹週刊》未，答一句yes，賓架A就建議：「不如你私底下開一個商界名人太太嘅mediatraining班嘞，我可以介紹人客畀你，專門教啲阿太如何在不同情況下回答記者問題，以免名人家庭失控，事業受影響。你要教啲阿太如此答覆記者：唉吔，我個衰鬼老公好受女性歡迎嘅，佢有好多女朋友㗎，返嚟同我講，我都記唔晒，不過佢晚晚返屋企嘅噃，我哋老夫老妻都唔知幾好感情。哦，你有我老公同女人一齊嘅相片呀，畀張我啦，我今晚問吓佢！」左丁山聽完，為之失笑，對賓架A講：「不如你開班授徒啦。」賓架A話：「呢啲事可大可小，老婆如果為老公事業、為家庭子女面子着想，應該私底下傾掂，話知你同老公喺屋企開大片啦，女人千祈唔好在記者相機錄音機之前破口大罵，上周刊封面嘅！」
男人就係咁樣睇件事，女士或者唔同意；以女士嘅角度睇，男人花心，首先犯錯嘅係男人，女人有反應做乜唔得？此乃感性與理性之別，商界名人如果有第三者做女朋友，通常係感性戰勝了理性，老婆知道之後，第一個反應當然亦係感性，呢回事，外人無法分清道理。但以前嘅名人經驗告訴我們，只要老公返屋企呵掂老婆，慢慢就會冇事。