旺角黑夜，交錯的霓紅燈下，一部客貨車疾駛而至，車門趟開……腦海即時湧起這闋歌：「來懷念過去，來忘掉錯對，共渡……」嘩，係咪要走避一下？果然，車上衝出幾個……辣妹！「唔通你以為係陳浩南？閃開啦！咪阻住我哋去Wet！」哦……呆呆咁望住呢部個性鮮明的豐田Hiace，心諗，我對佢嘅認識，係咪太膚淺？
記者：黎頌詩
攝影：周旭文
Models：草、AK、Ruby、WaiWai
梗有一架喺左近
沒錯，我們選了Hiace為豐田嘅明星車！要晒冷，不少品牌都以跑車亮相，而Toyota別樹一格，一部貨Van都可以贏盡歡心，唔到你唔服！當然，要數豐田名車有一大堆，但講到跑得睇得，兼且用途多多，再加埋人氣之盛，就肯定非Hiace莫屬。早就知Hiace長期熱賣，不過今日親眼見證。原來喺旺角街頭，只要留心一下，前後左右，總會發現有一架喺左近，咪話唔誇張。其實早於80年代初，Hiace已經登陸香港，一直都係搵食車嘅熱門選擇，甚至政府部門，都選用它服務市民。唔少人封佢為Van王，都算當之無愧。
早期的Hiace，實用掛帥，方方正正，唔太有睇頭。不過隨住外形同性能上不斷改良，今日嘅Hiace絕對有姿勢兼有實際。外觀上，車頭造型更為流線，巨型嘅顏色頭尾泵把，電鍍鬼面罩，大刀闊斧嘅線條，粗獷得來也自有型格。側睇？一貫貨Van格局，不過實用性高嘅招牌巨型雙趟門，一樣搶分！今時今日，用埋佢做多用途玩樂車，都無失禮。
實際無花巧
升格嘅唔單止係個樣，今年代理仲引入埋歐盟四型Turbo引擎，同加強散熱功能嘅Intercooler，馬力輸出同操控表現都有所提升，起步同加速全無拖泥帶水，好力之餘駕駛樂趣都有埋。講到明搵食拍檔，朝夕相對，合拍最重要。坐得舒服，操控得心應手，必備條件。Hiace內櫳陳設媲美一般房車，中控台鋪排整齊美觀，操控就手之餘，行車資訊一目了然。講到最貼心，要算係前排中間座位可變身成餐桌嘅設計，相信不時無啖好食嘅搵食車司機就最Buy，隨時開餐都方便好多。另外，門邊電鏡調校、加多個魚眼鏡，仲有埋泊車警示器，都係提升駕駛安全之作。可以說，不見花巧，一切以實際為先，幫你舒舒服服，搵多兩餐。
1. 邊個話貨Van型唔起，大大個顏色頭泵把加Intercooler，確有啲跑味。
2. 1,320mm×1,540mm×1,795mm嘅載貨空間有幾大？睇四個靚女塞晒入去都咁鬆動就知啦！
3. 後排有獨立冷氣出風口及調校，加埋夠晒闊落，嘆過唔少七人車仔。
4. 雙趟門，無論上落嘅係貨定人，都一樣咁暢順。
5. 自動波版本一向最具人氣，梗係！操作更輕鬆，女仔都揮灑自如。
6. 後排座椅設計唔太講究，不過一樣坐得舒服，椅背亦可摺叠。
7. 最欣賞這特大腳踏，夠晒方便實用，其他車種無得比。
8. 4前速自動波，起步同加速表現都完全唔失禮。
9. 側鏡又方又大，同車身線條夠呼應，睇位睇靚樣都咁清楚。
規格
‧引擎：2,982c.c.Turbo
‧馬力：108ps/3,000rpm
‧扭力：29.2kgm/1,200-1,600rpm
‧傳動：4前速自動波
‧查詢：豐田商用車中心（27440110）
改到癲
好難令人相信，貨Van可以成為熱門改裝車，不過，Hiace無論喺日本祖家定係香港，都一直係唔少車迷嘅「整容」實驗品。香港Fans鍾意將Hiace外觀加包圍拉花扮跑車；內裏就粉飾到花枝招展Warm過屋企。不過講到夠癲夠激，就始終唔及日本人。這部睇嚟都算作表作，成架Hiace搞到走晒樣，一副另類戰車Look，我諗，遲啲Hiace有機會變埋機械人。
搵食有計
Hiace擺到明搵食格局，不過原來只係諗到用嚟運吓貨載吓人就真係大材小用。今年東京車展展出嘅一部Hiace流動寵物護理中心，就絕對叫人拍爛手掌。Van仔細細，竟然有埋浴缸同各樣護理設備，果然潛能無限。咁……會唔會有埋Hiace魚蛋車、雪糕車、髮型屋……呢？
大棚Fans
靚車FansClub大家見得多，連貨Van都有咁多Fans都算夠晒威，本地嘅HiaceFansClub竟然唔止一個，最有規模嘅要算「Hiace同學會」，佢哋唔止有網頁交流心得，仲有聚會聯絡吓感情，要對呢部Van王有多啲了解，就真係要上去睇睇。
網址： http://www.hk-hiace.org