香港人口口聲聲話要健康，但卻不抗拒JunkFood，明知熱狗係「垃圾」，卻無懼癡肥危機，8吋長大肉腸都仲未識驚，狂加茄汁沙律醬他他醬，仲要撒多層芝士碎煙肉粒蘑菇片，肥死！今次試食兵團無懼癡肥危機，大啖咬熱狗，健康？瘦身？ComeOn，食完先講啦！
記者：盧家蕙
攝影：周旭文
Model：阿健、Stephaine@StageModels
免費任溝最過癮
Toppings是名副其實的「小店」，舖位100呎左右，座位只得2個，拍攝時多番阻礙客人叫外賣，店主Peter卻不以為意：「唔緊要啦，我呢度成日被人包場，4個人包得晒！」店雖小，食物選擇倒不少，店內有13款熱狗，可選配法蘭克福腸、蘑菇腸、牛仔腸、白豬肉腸等，還提供漢堡包、小食及沙律，食時不妨叫店員將熱狗一開二，加入不同醬料及配料，同時享用兩款口味。
8吋長肉腸足秤，店內的配料架提供蘑菇、芝士、青瓜茸、煙肉粒、粟米粒、洋葱、菠蘿等12款配料，另設茄汁、燒烤醬、沙律汁、芥辣醬及他他醬5款醬料，全由客人自由發揮，咁咪蝕？「客人加得幾多！價錢包埋喇，點會蝕！」Peter豪氣地說。開業以來，已成功吸引一堆西裝友、OL及學生妹成為粉絲，也有人專程驅車來買熱狗。「一日可賣80多隻熱狗，加埋其他，生意OK，希望衝出炮台山，俾多啲人接觸美式熱狗。」
香草白豬肉腸$25
白豬肉腸煎得皮脆肉嫩，肉腸香草味突出，跟芝士及番茄粒口味很夾，更覺香濃美味。
Stephaine：我覺得最好食，肉腸最香，唔同一般用的雞肉腸或司華力腸。
阿健：好香口，麵包外脆內軟，條腸有香濃的香草味，應該無人會抗拒。
總評：9分
讚：熱狗8吋長，款式夠多，配料任加，抵食夾大件。
彈：改選套餐（加$4包汽水）或特選套餐（加$9包汽水及薯條），計埋$30或以上，價錢略貴。
8吋大熱狗製作過程
牛仔腸熱狗$25
牛仔腸入口夠煙韌，肉味不錯，澆上芥辣及番茄碎，加多幾片蘑菇，好味又飽肚。
Stephaine：牛仔腸好特別，食落有好香牛味，落芥辣最好，Perfect！
阿健：我無牛不歡，這款牛仔腸好好味！好有美式風味，仲好食過白豬肉腸。
辣肉醬熱狗$23
辣肉醬自家溝出來，偏辣，肉碎充足，熱狗添惹味，配薯條吃一樣吸引！
Stephaine：少少辣好惹味，條熱狗腸唔錯，皮脆肉辣，不過食完好口渴。
阿健：最鍾意呢款，辣肉醬好開胃，味道辣辣哋，比起加芥辣更加香口。
Toppings（28870832）
地址：炮台山宏安道2-12號地下9號舖
營業時間：星期一至五11:30am-8:30pm、星期六12:00nn-8:30pm
赴美偷師學整狗
Toppings店小偏遠，JustHotDog位置仲騎呢，藏身於觀塘工廠區，店主Jeff今年5月於美國旅行，此行竟造就他轉行的決心：「食足幾日熱狗，越食越好食，決定學師在香港開熱狗店，仲特登去荷李活著名的Pinks熱狗店取經。」為了帶來最原汁原味的美式熱狗，更直接向美國供應商取貨：「選用現時美國熱狗店常用的款式，如美國風味腸、車打芝士腸、墨西哥辣肉腸等。」
由於店子尚新，只集中火力賣五款熱狗，熱狗套餐還包沙律及飲品，盛惠$30，沙律有煙肉薯仔、青蘋果西芹絲、椰菜蘿蔔絲或雞蛋薯仔等口味以供選擇。
惹味香辣熱狗
墨西哥辣肉腸，伴以秘製辣肉醬及新鮮洋葱粒，肉腸香辣，肉醬醒胃，嗜辣者必點。
Stephaine：較細隻，肉醬好好味，跟Toppings難分高下。
阿健：香辣腸配上辣肉醬，辣上加辣，好刺激！
總評：8分
讚：套餐包沙律及飲品，沙律絕不馬虎，口感豐富，一律$30（自取$28），比Toppings抵食。
彈：暫時只得5款熱狗，熱狗不及Toppings的巨型（腸身約短1.5吋）。
原味熱狗
車打芝士香腸配以洋葱汁及青瓜碎，灑上風味泡菜汁，入口酸甜夠開胃，口味偏濃。
Stephaine：泡菜汁辣辣哋幾好味，條腸好濃芝士味，正！
阿健：香腸本身的芝士味已好濃、好夠味，加埋泡菜汁同炒過的洋葱，好吸引。
田園風味腸
伴以番茄、青瓜碎及洋葱粒後，豐富又爽口，配上特色沙律醬，味道更添清新。
Stephaine：味道好香，有青瓜碎、番茄，食夠健康，食落唔漏唔滯。
阿健：唔及其他口味香濃，比較Fresh。
JustHotDog（35684677）
地址：觀塘成業街19-21號成業工業大廈9樓17室
營業時間：10am-4pm