粵首環保（1191）前身中富，剛於對上星期三正式改名，打正旗號做環保業，起碼要博翻半番。粵首呢期易主兼轉型，主打燃煤脫硫環保業。睇睇數據，今年6月，世衞官員話，因為環境污染（主要係水源及空氣）致死嘅人數，祖國在全球排第二。而粵首主營嘅廣東省地區，因為燃煤電廠排放二氧化硫，造成嚴重酸雨問題，兼被列為雙重控制區。粵首嘅環保業，食正晒國情國策。
又家陣主打環保污水企業，有好多選擇，但主打空氣污染呢瓣嘅，少之又少。加埋粵首脫硫能力，又喺全國十大之內，粵首彈出做呢瓣嘅龍頭，一啲唔奇。再講，粵首現價（0.34元）P/B不過0.75倍，環保股P/B低企1倍樓下，叫做低殘。買股買於股價微時，粵首上番非常睇好環保業嘅金勞詹成本價0.5元，要翻近半番，到時粵首P/B都係講緊1.1倍。
Joyce超賣博反彈
Joyce（647）由12月頭大股東撤回私有化計劃以嚟，股價插水兼大成交。而最大成交股數嘅三個交易日，佔咗街貨量4、5%水位，唔少散戶貨底，肯定震出街。Joyce私有化無望，股價咁殘仲有強手肯接貨，為乜？以技術走勢計，Joyce嘅14天RSI低於20，技術指標超賣，再跌喺0.25元兜底，博反彈，挨近NAV水位，以0.3元做目標，潛在回報率20%。
錢雋