《拉闊足球場》最新民意調查顯示，紅軍形勢不妙！英超明日爆發大戰，分別由利物浦對曼聯、以及阿仙奴對車路士。本來4隊各有Fans，不過兩位主持日前走訪旺角一球衣店，發現大部份被訪者都撐曼聯，就連《拉闊》的讀者亦不例外；雙「紅」大戰，利物浦可謂未打先輸。
下次舉行日期：20/12
想參加？即上
http://soccer.atnext.com/jp/soccer
牽牛今集提供
星期六11打比郡0:1米杜士堡（7倍）
星期日9利物浦1:2曼聯（9倍）
星期日21阿仙奴1:1車路士（6倍）
曼聯可勝3:0
牛：牽牛 強：強仔 N：Natalie
N：咦，牽牛，點解我哋《拉闊足球場》今日會嚟到旺角呢間波衫舖？
牛：梗係啦，因為禮拜日有兩場英超大戰，利物浦對曼聯、同埋阿仙奴對車路士，兩場大戰咁激烈，我哋梗係要搵球迷現場直擊吓啦！
N：好啦，出發！（鏡頭轉到一球迷身上）你好，我係《拉闊足球場》嘅Natalie，點稱呼呀？
強：我叫強仔。
N：哦，強仔，聽日有場英超大戰利記對曼聯，你點睇呀？
強：我覺得曼聯會贏3:0。
牛：曼聯對打比郡都係贏4:1，辛辛苦苦先贏3球，今次你估作客晏菲路淨勝3球，會唔會有難度？
強：梗係唔會啦，利物浦後防咁差，希比亞又唔掂，3球差唔多啦！
牛：你覺得曼聯贏3球，邊個入波先？
強：里奧費廸南、朗尼、同埋路爾斯安達臣啦！
N：贏3球，好呀！我都支持曼聯，因為我鍾意C朗（基斯坦奴朗拿度）！
藍軍食住阿仙奴
牛：牽牛 盧：盧立 N：Natalie
N：𠵱家喺我隔離有位全身藍色嘅哥哥，你點樣稱呼呀？
盧：我叫盧立。
N：你全身都着藍色，會唔會係捧「藍戰士」車路士呢？
盧：梗係啦，車路士係無敵㗎！
牛：呢場車路士無咗杜奧巴噃，點入波呀？
盧：冇杜奧巴唔緊要，可以靠核彈（舒夫真高）嘛，佢咁勁！一個打幾個㗎，烏克蘭核彈呀！
牛：但係冇艾辛，中場冇人「掃波」，驚唔驚呀？
盧：唔使諗啦，冇佢有核彈頂住咪夠囉。或者出嗰個廢廢哋嘅沙洛文卡勞，廢得嚟都識入波。
N：其實我都唔想阿仙奴連輸兩場（只計英超），希望佢哋今次和波，和和氣氣收場啦！
下周一齊齊玩
牽牛同Natalie下周一晚上6時，將會再到球衣店「球迷世界」進行現場直擊，屆時仲會大派禮物，有興趣的讀者記住到時踩場！
地址：九龍彌敦道582-592號信和中心305室
利記靠主場頂住
作為紅軍擁躉，Ringo成為節目少數撐利記今次可以贏波的球迷；縱使其他讀者和數據方面，都一面倒傾向曼聯。
Ringo認為，今季主場面對「倫敦雙雄」阿仙奴和車路士，都可以先開紀錄，雖然最後都被對手迫和，但已顯示出晏菲路球場的威力。兩場比賽入面，利記都壓住對手來打，未能入第2球只是欠運使然；所以利記主場出擊實在不容小覷。
雖然牽牛質疑賓帥今仗未知會否再排「怪陣」，但Ringo就有信心紅軍會沿用強陣，務求殺退死敵曼聯。
Ringo貼士
星期六11打比郡0:0米杜士堡（9.5倍）
星期日9利物浦2:0曼聯（8.5倍）
星期日21阿仙奴1:1車路士（6倍）
睇往績要入「魔」
金水一向無寶不落，今次棄「紅」入「魔」，皆因曼聯對賽真係剋死紅軍；以近3季英超比賽來說，曼聯1次都未輸過畀紅軍，戰績係6戰5勝1和，強到無人信。
牽牛係都好認同呢一點，佢話呢兩隊對碰，就好似車路士專剋阿仙奴，有「格食格」的感覺。
除咗睇往績，金水亦指出紅軍喺周中歐聯迎擊馬賽，雖然大勝4:0，不過始終是生死戰，氣力損耗不少；反觀曼聯早早出線，周中就以副選兵對羅馬，此消彼長之下，令曼聯更佔上風。兩大理由支持，金水決定入「魔」，撐曼聯作客贏2:0。
金水貼士
星期六11打比郡0:2米杜士堡（8倍）
星期日9利物浦0:2曼聯（9.5倍）
星期日21阿仙奴2:1車路士（8.5倍）
