九龍塘楊小姐食髓知味，早排短炒中石油（857）有斬獲，見中石油噚日跌落14.24蚊低位，再度推介博反彈，建議現價買入，揸到農曆新年前。楊小姐推介中石油有原因，「中石油A股股價有支持，噚日A股一跌落30蚊邊就即刻反彈，估計H股喺14蚊亦會有支持。」
楊小姐對中石油充滿信心，唔定止蝕位，孫柏文好奇問：「唔驚會跌穿14蚊咩？」楊小姐就話：「中石油喺14蚊好硬淨，唔相信會落到13蚊，估計只會喺現價上下徘徊。」
要交暴利稅 短炒風險大
另一位網友西貢Peter亦睇好中石油，博低位反彈，建議買入價14蚊，短炒3個禮拜，目標價16蚊，博升14%，止蝕價13蚊。
噚日中石油最多跌2.5%，曾見14.12蚊，收報14.24蚊，跌幅收窄至1.7%。
亨達集團研究部董事黃敏碩覺得：「短炒風險幾大，雖然油價易升難跌，但投資者要留意，臨近年尾，中石油要交成三百幾億人仔暴利稅，比舊年增加三成，而內地又講明今年下游業務（煉油）嘅補貼唔會多，呢啲都困擾石油股表現。」
黃敏碩又話，𠵱家中石油H股有唔少蟹貨，現時大市走勢不妙，中石油H股未必會跟A股反彈，即使年尾有機會反彈，但穩陣計，建議調低入市價。
A股30蚊強勁反彈 利H股
聽完黃敏碩分析，楊小姐仍然相信現時係入市時機，「我明白黃敏碩分析嘅基本因素，但睇番大市氣氛，大陸股市噚日先跌後倒升1%，中石油嘅走勢亦係咁，喺30蚊有好強反彈，相信A股會帶動H股，喺14蚊嚟個反彈。」
黃敏碩提醒：「今日H股指數跌穿100天平均線，中石油就仲企喺13.9蚊100天線樓上，嚟緊中石油會跟H股定A股走，要睇市場氣氛，而近排市場係掟貨多，追貨少，短炒入市都係要小心謹慎。」
陽光紙業（2002）
非龍頭難突圍
網友何文田David話自己喺陽光紙業（2002）掛牌首日喺市場入貨，𠵱家坐緊艇。被問到點解咁勇？David話：「我見佢幾硬淨，上市當日無穿底，六個一左右。」陽光噚日跌1.8%，收6蚊。
不過，原來David唔知陽光嘅業務性質。黃敏碩話：「陽光造白面雙版紙嚟講，喺產量上唔係咁大，未來增長空間有限；𠵱家市場又擔心紙業市場供過於求，所以紙業股跑輸大市。」黃敏碩再講：「第一，你買嗰隻已經唔係龍頭股，第二，要留意成個市場有過剩嘅情況，令股價估值唔應該再係咁高。」
孫柏文話：「中國做任何加工或者工業，難逃一有錢賺就一窩蜂去增產嘅厄運。我記得睇過玖龍紙業（2689）個expansionplan，當時我都驚奇，使唔使發展得咁快呀。」所以佢個人覺得行業前景有啲憂慮，提醒David小心啲。
-David個案-
買入價：$6.23
目標價：$6.8
止蝕價：$5.5
時間：1星期
專家回應：非業內龍頭，吸引力一般，宜伺機套利，可考慮換馬至零售股
中銀香港（2388）
避鋒頭等調整
西貢Peter打上嚟話，留意到中銀香港（2388）成日都係20至22蚊區間波動，認為好似幾有保障，想問吓入唔入得過。中銀噚日曾經低見20.9蚊，午後隨大市低位反彈，收報21.55蚊，跌0.7%。
孫柏文講番，前日任志剛提到有本地銀行受次按拖累而見紅，「但中銀算唔算本地銀行先？佢有冇份呢？」黃敏碩即刻補充，中銀之前都披露過相關數據，「佢哋次按（相關產品）都有成16億美元（下同），東亞6億，中信嘉華就有3.4億，富邦就有9000萬。以今日（噚日）股價表現睇嚟，就似係富邦同中信嘉華嘞。」
黃敏碩提醒，其實好多嘢可能都未浮現出嚟，「我覺得中銀相對冇咁差，不過短期都係避吓鋒頭，等佢調整下先再入，始終穩陣啲好。」
Peter建議：考慮入貨
專家回應：中線可取，惟短期本地銀行股勢受次按因素拖累，跌至$20.5以下始考慮
莎莎國際（178）
又到聖誕！炒零售股
北角阿Ben推薦莎莎國際（178），原因係聖誕將至，有助刺激零售市道，相信零售股嚟緊會當炒，建議現價3.55蚊買入，目標價睇4蚊，看升13%，止蝕位放喺3蚊，預計投資期1個月。
黃敏碩問番阿Ben：「炒零售概念點解唔炒周生生（116）、唔炒六福（590），又唔炒卓悅（653），乜原因要考慮莎莎？」阿Ben解釋：「莎莎呢排形勢大好，大市跌佢都照升，睇走勢圖同技術指標已經夠照，絕對可以考慮追入。」
莎莎噚日表現的確幾神勇，股價低開少少，好快就拾級而上，升咗6.9%。
黃敏碩話：「莎莎早前公佈港澳銷售增加三成，未來喺控制成本方面亦做得幾好，本身已經慢慢轉為形成一個品牌。」佢提醒，高追有風險，因為炒股除咗睇走勢，仲要考慮埋公司基本因素同業績，「不過，化妝品邊際利潤通常比較高，值得考慮，以現價買莎莎略為偏高，故建議等莎莎回返到3.3蚊較為值博。」
-阿Ben建議-
建議買入價：現價
目標價：$4
止蝕價：$3
時間：1個月
專家回應：港澳區核心店舖銷售增長理想，具內地零售概念；現價過高，宜$3.2吸納，$3.6至3.8分段套利
下周一嘉賓：荷蘭銀行私人投資產品部副董事何啓聰
每日4:30pm
歡迎Phonein28698262
http://appleactionews.com/features/finance/
請登入網址
http://appledaily.atnext.com/jp/finance登記
成功參與節目者，有機會獲贈禮品
＊以webcam參與節目，額外獲贈KFC$200現金券
