葉翠翠早排參加無綫遊戲節目《開森玩家》，佢搏晒命咁玩，結果贏得200包護舒寶衞生巾、140支潘婷洗髮乳同140盒面膜，贊助商大前日將呢批幾十箱嘅禮物送咗去將軍澳電視廣播城，可惜佢未及點收已經有三箱不翼而飛。
葉翠翠見堆積如山嘅禮物都拎唔到返屋企，自己一口氣又用唔晒，所以佢就做咗聖誕女郎，將衞生巾同面膜呢啲貼身用品送畀幕後化妝同髮型嘅姐姐，據知清潔阿嬸都受惠。
自己用驚過期
識做嘅翠翠為咗唔厚此薄彼，又將洗髮乳送畀監製同其他男工作人員，實行人人有份，皆大歡喜。有監製見到呢幕聖誕派大禮場面，更取笑翠翠：「我第一次喺電視城有人派衞生巾，真係奇景。」有禮物派都俾人笑，真係好唔抵！
葉翠翠送禮物被人揶揄，佢噚日喺電話度話：「其實我贏幾百包衞生巾，自己點用得晒，計我一個月一包，起碼可以用22年，但呢種咁貼身用品又有期限，我咪想同人分享，點知𠵱家俾人笑。」