陶傑說︰「書是終身的朋友，執書櫃就像一次回憶，找回許多老朋友。」聽起來浪漫，執起上嚟，就頭痛到令一眾才子才女都耍手擰頭。明明想找愛書之人，講吓如何錫書愛書，執得整整齊齊，卻發現他們大多都愛「亂中有序」。也許等份報紙出咗街，我就可以大條道理同阿媽講︰「嗱，腹有詩書自己知，或者書櫃越亂先至越有才氣呢！」
記者︰劉昱蘭
攝影︰黃子偉、陳盛臣、陳陶鈞、梁細權
拒用鋼架免金剋木
入到陶傑家中嘅書房，三面牆都放滿書櫃，唔係咁點放得落二、三千本書。佢家中有兩間書房，一間放中文書，另一間就放英文書，中文書房有一大排花梨木書櫃，中國味濃；英文書房就放一般淺色實木書櫃，比較現代化。問陶傑有冇用過鋼書櫃，佢立即掉下兩句：「書紙用木造，所以書屬木，如果用金屬書架，金剋住木，咁點會用鋼書櫃呢？」有根有據。
GlobalValleyvsChinaTown
兩間書房分放中英文書，因中西文化不同，內涵亦有異，中文書是回望過去歷史深厚文化，英文書則看新穎論調創新思維，陶傑還笑說英文一邊係放潮書嘅GlobalValley，另一邊亂少少雜物亦多幾件嘅係ChinaTown。根據中西排放只係簡單分類法，陶傑性格不拘小節，橫放豎放四圍塞在所難免，跟佢嘅「書櫃唔使點執，大概知喺邊就OK」嘅說法好脗合。當佢搵唔到想要嘅書時，最佳方法係叫librarian──佢太太幫手搵。陶傑太太話曾經幫手大執書櫃，但執咗3、4個月都未完工：「結果執完個尾，個頭又開始亂番晒，真係要投降。」咁有冇諗過掉咁部份呢？陶傑說：「書就似紅酒，越嗒越有味，初時睇唔明，過多幾年再睇又變另一種味道，點捨得掉？」
但現實係始終有一批書跟樟腦防潮珠一起放入箱，嗰批書唔代表好耐冇睇，只係自覺吸收晒又唔會再睇，難逃打入冷宮嘅命運。
漫畫用A-Z分類
相信歐陽應霽應該係最佳示範，佢認為執書就似呼吸一樣係每天要做的事。上到佢office，打開趟門，見到個7層坐地頂天的書櫃，每層分成不同類別，井井有條。頂層係歐美書籍，下兩層係大陸書，再落係台灣書，最底係飲品類。成間office嘅書都關於飲食文化，新office嗰邊就放設計書，屋企就放旅遊和文化書籍，原來每個地方才是個大書櫃。
「我每日都要用2、3小時執書，咁先可令啲書serve到我。每類書我都有唔同分類法㗎，設計書就跟Fashion、Graphic、室內設計等內容分類；漫畫就因本本差唔多大細，用A-Z分就最整齊。而關於唔同地方嘅書籍，就唔分內容，只跟國家排好。」所以就算成間office有上萬本書，仍有條不紊。阿齋嘅分類法值得參考，最重要係養成每日執書嘅習慣。
才子佳人點執？
高慧然：
「買書就好似買衫咁，買返嚟唔啱睇就要掉。我屋企近千本書，冇乜點執過，不過大概知放喺邊就算。」
邵家臻：
「以前我分類分得好清楚，但慢慢就變為常睇類、裝飾書架類……因為懶執。當我想逃避煩惱時，就會執書。」
保養8法
想知啲書點保養得好啲，睇嚟問呢班才子都冇乜料到，等二手書店梅馨書舍老闆鄭生，教你執書時要注意嘅妙法仲實際。
1.古人曬書可防潮，但因當時嘅書係用宣紙，現今嘅紙質曬都冇用，春夏時期一星期抽濕兩次就夠，冬天就打開窗保持通爽。
2.想幫書面除污，可用白電油。
3.珍貴書籍就要入袋包好，簡單方法已可保存得好好。
4.書櫃長度最好不要過60厘米，否則書太重好易令木板彎曲。
5.唔好在書上再放書，加上無謂嘅壓力令佢變形。
6.最好填滿每個書格，令書籍可以夾得實實，保持直身。
7.絕對不能把書打斜擺放。
8.重書放書格兩頭，輕則置中，書架冇咁易彎。
