有一種緣份，求之不得，就算跑到《兩妻時代》裏的「如果愛」婚姻介紹所，也未必能找到：觀眾緣是也。《兩》劇第二女主角梁靖琪（Toby），出道以來一直是網友標靶，彈她聲線沉賣性感演技差，說到底還是欠觀眾緣。難怪對於同是天涯淪落人的欣宜，Toby豎起手指公大讚好嘢，還說：「換咗我係佢，一早就癲咗！」
在劇集《兩妻時代》裏，首次躍身女主角的湯盈盈搶盡風頭，惟獨是小焦梁靖琪，觀眾反應仍是批評居多，彈她演技差聲線沉，但有人卻不知Toby有份唱主題曲，猛讚好聽還不住問主唱者是誰。
挑逗變搞笑
在《兩》劇中，Toby應導演要求頻穿緊身tee短褲仔，網友批她賣性感，Toby卻說：「一性感我就唔係好得，可能我比較粗魯，仲試過連條裙攝咗落打底褲度都唔知！有場戲講Bobby（歐陽震華）幻想我色誘佢，一諗起要擺埋啲咁嘅可怕甫士真係毛管戙，好彩Bobby提點我，拍嗰陣猛同我講：『開始喇，剝啦！慢慢剝！』不斷畀自信我，盈盈都教我點樣女性化啲。」
自知念對白咬字不清，Toby日夜「讀」書，又拜師學演戲，但觀眾永遠只看到「梁家樹女兒」五個字，就像欣宜永遠背負鄭少秋沈殿霞女兒的名字。Toby謂：「我嘅觀眾緣的確唔係咁好，始終爸爸媽媽喺呢行，觀眾好難接受。好似欣宜咁，佢都好可憐。我睇番肥姐落救傷車嗰刻，好多人阻住，救人真係爭分奪秒，但欣宜仲可以好有禮貌咁講『唔好意思』，佢真係好犀利！換咗係我一定會癲！佢真係IQ同EQ都好高！」
入行三年，觀眾對Toby挑剔多多，曾令她自信心大跌，幸好現已漸漸適應過來：「我唔可以要所有人都鍾意我，要慢慢嚟，等佢哋知道我唔係靠爸爸。冇挑剔就唔會有進步，我𠵱家諗通咗，如果畀自己越大壓力，反而做得越唔好。」
不介意露毛
Toby續說：「好似話我喺《歲月風雲》嘅喊戲好差，我就當係學習。我畀自己50分，希望出年可以有60分。𠵱家播《兩》劇，觀眾嘅批評已經少咗。」最近Toby斟拍電影，問到可有意效法湯唯在《色，戒》裏的大膽演出？她笑道：「露胳肋底毛就可以！或者到時我會問導演可唔可以露少啲，甚至留番下一部戲先露啦！」
採訪：吳佩思
攝影：陳偉權
髮型：MichaelLamofHairCulture
服裝：CLUBMONACO
場地：ALCOVE（洞天）
