花旗股市喺歐美央行聯手救市行動出台之後雖然反覆，但直到前晚仍然保持上升趨勢，不過，由分析員嘅評論同股市氣氛嚟睇，投資者對救市方案嘅成效唔係有好大信心。
今個月係聖誕月，好多人希望個市升，但主觀願望會唔會變成真要睇環境係咪配合，如果個市係得散戶咁諗而大戶準備棄船，咁樣𠵱家大戶做緊嘅嘢就係派發，過多幾日，大戶會點做就唔使講明嘞。
任總呢排曝光率好高，仲次次語出驚人，但係驚人唔代表係吹水，大家要諗嘅係呢啲說話係貼近事實定譁眾取寵，以任總嘅江湖地位，斷估唔會係吹水，點解任總要提出本地銀行全年業績可能見紅嘅警告呢？因為本地銀行唔慣發盈警，況且係咪見紅好視乎撥備係咪足夠，好似滙控（0005）咁，已經講咗幾次話足夠，但係係咪咁投資者又信唔信？大家有眼睇，總之都係嗰句，次按個煲咁大，爆咗都有排執番啲碎片，邊有咁快搞得掂？
港股昨日繼續尋底，埋單又唔見180點，下禮拜一會點，都係要睇花旗股市同埋周末國內有冇新宏調措施。
有機會升5成
蒙牛C輪2049：蒙牛（2319）昨收28.40元，雖跌3%，但向上走勢未變，破到30.70元可以睇33元，可以買啲C輪2049短炒，昨收14.5仙，有效槓桿率5.2倍，正股升上30.70元，2049有近5成升幅，正股跌穿26.80元止蝕。