臨到年尾，又係回顧嘅時候，今年金融界大事除咗「大奇迹日」不斷重演，最令大家盡興梗係地產商李四叔化身「香港股神」，打救股民。不過，有喜有悲，次按危機，搞到臨年尾要五大央行一齊出手。華華齋吹冇乜系統，景順投資管理出咗份報告，用A至Z回顧呢一年嚟環球金融投資大事，梗唔係Aforapple咁簡單，呢26個幼稚園小朋友都識嘅字母，注入新含意後，投資者睇落應該好有感覺。
2007全球投資回顧A-Z
‧A：Art 當代藝術品價值今年急升55%
‧B：Bubbles 投資泡沫充斥全球
‧C：China 中國經濟及股市表現驚人
‧D：Dollar 美元跌至歷史新低
‧E：EmergingMarkets 新興市場仍然是全球投資焦點，非洲開始受注意
‧F：FixedIncome 國庫債券孳息收入受信貸緊縮拖累急跌
‧G：Gold 金價重上80年代高位
‧H：HedgeFunds 今年對冲基金的表現好壞參半
‧I：InterestRatesandInflation 通脹持續，料08年開始回落，息口亦開始向下調
‧J：Japan 日本是反向思考投資者的墓地
‧K：King,Mervyn 英倫銀行行長金默文被外界批評忽視信貸危機影響
‧L：LIBOR 信貸緊縮使LIBOR高過央行利率
‧M：Mortgages 美國次按風爆打擊全球信貸體制
‧N：NorthernRock 次按危機中最大受害者
‧O：Oil 全球需求僅增加1%，原油價格卻升至100美金一桶
‧P：Property 英國與歐洲物業價格顯著下降，惟下調屬暫時性
‧Q：Quarter4rally 過去4年錄得升幅的美國市場，料標普指數升幅低於一成
‧R：Russia 俄羅斯錄得持續經濟增長，在西方社會扮演舉足輕重角色
‧S：StanO'Neal 美林首席執行官奧尼爾因美林在次按危機中損失約80億美元，宣佈辭職
‧T：Take-overs 私募基金促成多宗收購交易
‧U：US 美國信貸緊縮及房地產價格下降
‧V：Valuations 全球基金錄得近二十年來最少利潤，基本市場價值亦未可預測
‧W：Warming,global 全球暖化趨勢不可逆轉
‧X：Xpectedearningsgrowth 分析師已調低預測盈利增長，但明年整體仍較今年增2%
‧Y：Yankeepeso 加拿大人取笑美金為披索
‧Z：Zuma 南非擔心總統權力轉移到JacobZuma
AforArt
大劉3億買《清晨》
藝術無價，藝術品有價，尤其經濟好，有錢自然肯使，所以今年唔少名畫喺拍賣會都賣出好價錢，尤其當代及現代名畫。今年轟動全球嘅係荷李活紅星曉格蘭特將6年前買下嘅「玉婆」伊莉莎白泰萊畫像拎出嚟拍賣，結果1.8億港銀賣出，大賺1.56億銀。
不過，對香港人嚟講，今年最經典嘅就梗係大劉劉鑾雄，佢豪擲3億港銀投得印象派大師保羅高更嘅名畫《清晨》。華華記得，佢06年用1.35億買咗AndyWarhol幅《毛澤東》，今年再下一城，你話佢幾咁睇好名畫市場。
大劉講過，買畫如買股，要做功課，唔可以跟風，只要揀中目標，就好似買大藍籌咁，有買貴，冇買錯，而且名畫投資未現泡沫喎！
BforBubblesCforChina
中國跟住泡沫
要形容今年嘅經濟，最多人用嘅詞語肯定係泡沫，美國同內地嘅樓市有泡沫、港股及內地股市亦有泡沫，就連商品如紅酒等都有，樣樣炒到飛起，泡沫越升越多，大家自然擔心唔知幾時爆，美國樓市就因為次按危機出現咗率先爆，咁下一輪到乜呢？
最多人驚嘅係內地股市，景順投資管理個報告話，大陸呢十年嚟經濟增長已經係一個奇迹，今年嘅內地股市更加係奇迹，上海綜合指數喺呢一年就升咗85%或2282點；而深圳綜合指數仲勁，升咗136%或751點，難怪個報告係CforChina。
GforGold
一注獨贏買黃金
金價升勢凌厲，G梗係用黃金做代表。今年油價急升、美元疲弱、通脹加劇，刺激金價衝破每盎斯800美元，最高曾見833美元，一度逼近80年代850美元嘅歷史高位。全年金價由低位，累積升超過三成，最新收報807美元。
黃金升勢凌厲，本報專欄《金手指》作者孫柏文最開心，因為佢今年做咗股市「明燈」，跟佢買股，幾乎隻隻都坐艇，唯一跟得過就係聽佢講，一注獨贏買黃金。做得「金」手指，應該知道金價！
NforNorthernRock
全拜次按所累
NorthernRock貴為英國五大抵押借貸機構之一，管有1000億英鎊按揭資產，雖然NorthernRock冇投資任何次按相關產品，但由於NorthernRock太過依賴其他銀行提供嘅短期貸款，受次按風暴衍生嘅信貸緊縮潮影響，流動資金短缺，搞到擠提，要英倫銀行打救。
其實一場次按風暴，受拖累嘅又點止NorthernRock，噚日任總整咗個啞謎畀大家估，話香港有銀行因次按業績會見紅，你又估唔估到係邊間？
電郵：mailto:[email protected]
