港大醫學院慶祝創立120年，噚晚喺會展筵開200席舉行一場世紀reunion，幾十年前得一間醫學院，所以早年香港醫生絕大部份係港大出品，八方現場所見，幾乎全香港略為有頭有面嘅醫生都有到場。
港大醫學院有歷史優勢，所以本地醫療體系高層都係港大幫天下，食物及衞生局局長周一嶽係代表人物，佢噚晚攜眷出席。好多醫生子/女承父業，嶽哥就話女大女世界，大女喺英國讀藝術，細女則主修酒店管理，兩個女都無意行醫。佢話畀學費細女讀書，細女要去酒店實習，執房、洗廁所、搬行李乜操重嘢都要做，不過返到屋企就打回原形十指不沾陽春水，仲要請工人服侍佢。