日產天眼昅實360° 旺角S位未驚過

日產天眼昅實360° 旺角S位未驚過

對女士們或新牌仔嚟講,塞隧道、斜路掉頭未算高難度,最怕反而係泊S位,硬係驚揩親側邊啲車、人或柱位,尤其旺足24小時嘅旺角,揸住七人大車千祈咪諗住泊咪錶呀!好彩日產首創咗個360°天眼系統,昅實車身四邊,睇住個芒嚟泊車,好似打機咁簡單,旺角S位變得好碎料!

記者:梁美甜
攝影:楊錦文
模特兒:Mickey、Judy

全球首創泊位無盲點

唔係講笑,問過好多女仔朋友,都話最怕落人多車更多嘅旺角,泊街邊咪錶更屬禁忌!唔係話泊唔到,只不過時間耐啲,又容易揩花刮損部車囉。日產嘅設計師就夠細心,度咗個全球首創嘅360°天眼系統(AroundViewMonitor),即係喺車頭車尾及兩側安設共4個鏡頭,將車身四周環境拍到嘅影像,即時傳送到Elgrand內置嘅電腦入面,經轉換後就可以喺錶板上個8吋芒度睇到全方位影像,再加埋四個角嘅感應器,有聲有畫提晒你有無障礙物,完全無盲點,好似打遊戲機一樣,跟屏幕提示泊位,只要視覺同聽覺正常就成為泊車高手,就算七人大車一樣舞得掂,實用得嚟又幾盞鬼喎!

■老婆泊車唔再嗌救命,老公當然放心喺車後獨嘆DVD影院啦!

實用七人車配跑車偈

聽好多車行Sales講時下好多人,尤其係年輕人或者Couple,買車決定權往往取決於女性嗰邊,可能因為咁,傾向實用嘅女性就選擇MPV或者4WD車形,所以近來MPV大熱。若然以屋企為大前提揀車,自己都會揀七人車,因為夠坐成家人寬闊舒服兼有位擺雜物,老人家上落又方便,最緊要部車副偈夠勁,唔係話要砌車,起碼揸起上嚟爽好多。
Elgrand副偈用咗同廠Fairlady350Z跑車嘅VQ35DE引擎,3,500c.c.加埋CVTC,馬力同扭力可以去到240匹同36kgm,夠晒Power揸起上嚟真係好夠力,踩油即到,上斜落斜輕易而舉,操控簡單易上手,對女士或新牌仔嚟講簡直天作之合。

■坐齊七個人都有位擺雜貨,兩小口隨時將後座變休息空間都得喇!

■大大個天窗,幾時同Honey卿卿我我都得喇!

■選七人車最大原因係坐得人多兼空間寬闊。

■Elgrand用3.5V6引擎,坐足七人都跑得起。

豪華設備夠舒服

Elgrand一向走豪華路線,除咗新置嘅天眼系統之外,其他豪華設備好似內置9GBHardDiskMusicBox、原廠DVD影音系統、5.1環迴立體聲音響系統連11個喇叭及Richbass超低音喇叭等,個DVD入碟位都唔使走去車尾整一輪,可以直接喺前座乘客位度換碟,比以前方便好多。要數最得我心就係個可調校儀錶板,一幅過、長而薄身連接彩芒,白光投射夠Cyber,除咗泊車嗰陣顯示影像之外,仲Show埋一般行車資料好似話油缸嘅油仲可以行幾多公里等,得意又型仔!

■加有桃木之中控台斯文大方,最正係可調校角度嘅屏幕,加埋天眼系統,泊車冇難度。

■DVD碟機放喺前座,以後換碟方便得多。

2008日產360°天眼系統Elgrand規格

引擎:3,500c.c.V6CVTV
馬力:240ps/6,000rpm
扭力:36kgm/3,200rpm
傳動:5前速半自動波
查詢:合誠汽車(28035333)

話你知
DesignForum爆創意

Elgrand之前有可以唱K嘅MusicEdition,今次又有全球首創嘅全方位泊車用天眼系統,咁多Idea唔知關唔關佢哋DesignForum事呢?日產由今日開始至16日一連幾日喺理工大學舉行展覽同研討會,仲請嚟設計師即席示範陶泥做車模,化意念為實物都幾震撼!有時間不妨俾自己個腦震盪一下,話唔定下一部新車關你事呢!

■香港係第七個城市舉辦NissanDesignForum

■日籍設計師即場用陶泥做車模,手勢又快又準,一陣間就刨好架車。

幻.想.像——日產汽車設計展覽.研討會

日期:今日至16日
地點:理工大學設計學院
查詢: http://www.nissan-global.com/EN/DESIGN/