和太太汪詩詩育有一名女兒Jasmine的甄子丹，昨日榮升第二任父親，汪詩詩昨晨7時在養和醫院順產誕下8磅重兒子James，甄子丹除拍下兒子的出世過程，還親手剪臍帶。平日在銀幕上做慣英雄的他，形容過程有些驚和恐怖。
現年44歲的甄子丹再做父親，昨日早上7時，比他年輕19年的太太汪詩詩在跑馬地養和醫院順產誕下兒子James，囝囝重約8磅，母子平安，甄子丹親自為愛兒剪臍帶，心情興奮又緊張。
「樣似媽咪髮似我」
甄子丹與汪詩詩已有一名女兒卓宜（Jasmine），今年3歲多，甄子丹昨日接受本報電話訪問時報喜說：「其實早幾日我老婆都試過似作動，但去到醫院又未生得，噚日凌晨3點幾佢作動，即刻叫的士去醫院，差唔多到7點先生，我喺產房幫手剪臍帶，過程有少少驚同埋恐怖，雖然已經第二次做阿爸，但我都好激動好開心，生嘅過程全部拍低咗，James個樣似媽咪，頭髮似我，中文名就未改。」
早前甄子丹在內地趕拍電影《畫皮》，專程請假回港陪老婆生仔，日內他將會復工，他說：「雖然好唔捨得，但上邊兩組戲等緊我開工，我覺得好唔好意思。」
送玩具馬𠱁大女
另外，汪詩詩胞妹汪圓圓昨日現身會展行婚紗騷，她難掩喜悅說：「比預產期早咗兩日，我成晚冇瞓，因為家姐半夜作動，我要照顧Jasmine，家姐驚Jasmine妒忌James，之前已經準備玩具馬以James名義送畀佢，Jasmine今朝探完細佬都好開心，仲問我James係唔係瞌埋眼揀隻馬仔畀佢。」
圓圓透露家姐今次生BB比上一次困難，她說：「上次佢痛咗半個鐘就生，今次痛咗幾個鐘。」問她會送甚麼禮物給姊姊？她笑言：「我咪送多啲時間幫佢湊兩個小朋友。」
採訪：羅慧敏
