舒淇前晚出席瑞士名錶積家錶慈善晚宴，戴上200多萬元的鑽錶到場，非常華麗，她又獲受惠機構的小朋友送上摺紙勞作，舒淇戴上小朋友摺紙手錶喜悅不已，盡展童真一面，更謂寧願意中人送上自製摺紙手錶，因為這樣更有心思。
瑞士腕錶名牌積家錶前晚於港麗酒店舉行慈善晚宴，大會捐出鑽石腕錶作慈善拍賣，為香港保護兒童會籌募經費，趙式明、趙金卿及兒子李春偉、霍陳琪琪等都有出席。
捐出酬金行善
當中身穿Gucci新裝的舒淇以嘉賓身份到場，並戴上價值200多萬元的ReversoLadyDiamonds鑽石新錶，行頭十足。大會安排受惠機構的小朋友代表，向舒淇送上自製的摺紙勞作答謝，她不時與小朋友玩耍，盡顯童真。
舒淇透露會把今次出席活動的酬金捐出，問她若遇到心愛的人，會喜歡手上200多萬的鑽石錶還是摺紙手錶，她笑說：「會揀紙製手錶，因為會覺得佢好有心，自己都會好開心，因為錶我可以自己買，細個puppylove時收過男仔自製嘅心意卡。我會盡量保持苗條身形，等待頭先送錶畀我嘅小朋友長大。」
懶理舊愛生日
見舒淇頗喜歡小朋友，問她是否有意做媽媽，她說：「我已經有兩個契女，一個契仔，總共助養咗十幾個小朋友，相士都批我會有一仔一女，都會對我好孝順，不過佢哋大部份都話我遲婚，𠵱家醫學咁發達，遲多十年八年生都冇所謂。」
過氣緋聞男友王力宏及張震都心有所屬，問舒淇會否羨慕，她說：「冇話羨慕，男女拍拖都好正常，自己重視事業，拍拖講緣份，我又成日周圍飛，相士話我緣份唔多。」日前舊愛黎明獲女友樂基兒送上超人氣球賀壽，她說：「冇打畀佢，佢有咁多人幫佢慶祝。」
採訪：RitaLeung
攝影：RickyChan
