大學校長到馬場，甚為罕見，一年頂多兩三次，其中一次為國泰航空邀請出席「國泰航空香港國際賽」睇吓國際盛事。另一次為蒙民偉博士邀請出席樂聲盃賽馬日。蒙博士捐錢捐勻畀全港大學，校長梗係要捧吓場嘅；此外，如有馬會大董邀請到廂房，唔好意思推辭啩！
國際賽日見到港大徐立之校長，傾咗幾句，醒起每年有「香港大學校友挑戰盃」，港大隆重其事，會包起馬會廂房請客，不少著名校友出席，校長當然親臨主持。散場後，返到屋企已近七點，見無綫翡翠台播出「傑出華人系列」，咦，係查良鏞先生噃，梗係要睇吓。次日，收到港台傳真，原來新一輯「傑出華人系列」除咗頭兩輯係徇眾要求重播最受歡迎嘅，但亦都重新剪輯過嘅查良鏞、李嘉誠（十二月十六日播出）外，仲有五位「新」人，就係港大徐校長（十二月三十日播），余英時（一月六日），丁肇中（一月二十日），朱德群（十二月二十三日）。嘩，左丁山何許人也，竟有資格與傑出華人徐立之一齊站在沙田馬場看台睇跑馬，不覺鬆毛鬆翼，以後可以學習戰前前輩文人講「我的朋友胡適之」咁樣，對別人講番句「我的朋友徐立之！」
自我陶醉之餘，手機響起，原來係銀行coldcall，花旗銀行來電話借我十萬元，固定月息二百八十元，隨時可以動用，無端端借十萬蚊做乜？月息二百八十元，全年還十萬三千三百六十元，每月還八千六百一十三元三角三仙，實際利率應該係六厘七左右，低過P（優惠利率），以無抵押私人貸款嚟講，唔知貴定平呢？肯定便宜過信用卡借錢。
呢位花旗營銷員，開口就話請左丁山借十萬銀，大概事先已做過背景調查。市場學著名教授S平時教學生CRM，講營銷之道，某日收到佢間銀行嘅顧客服務主任電話：「我係接替乜乜女士，負責S先生個戶口嘅，想話update啲資料！請問你做乜嘢職業，喺乜嘢公司打工……」S教授驚詫於呢位主任唔識CRM，基本功課都唔做就打電話嚟，費鬼事睬佢。做銀行客戶主任，唔睇報紙都要睇吓電視新聞吖，S教授不時曝光，佢竟然唔知，實在係懶！