昨日港股繼續跌，雖然只係跌180點，但唔少股票出現洗倉高峯期，唔計內房股、航運股及碼頭股，洗倉最嚴重係轉型業務嘅二三線股又或者概念股。概念股跌得勁，因為弱市之下，無實質業務嘅股票抗跌力較弱，可以理解。轉型股好些少，起碼收購完有收入嘅業務之後，叫做「有數得計」。
近年興搞水業及林業，近日中國林大（910）、中國水業（1129）跌到反艇，就連打正林業股旗號上市嘅三林環球（3938）都跌到無影，究竟係關市場事定係關股票事，無從估計，但一隻股票忽然被不問價狂質，點都要走人先。
要花長時間做功課
相比之下，有實質業務同盈利好轉嘅工業股仔，卻連日逆市大炒，老牌紡織股德永佳（321）兩個交易日勁升3成，都咪話唔巴閉，仲連帶同業福田（420）股價都扯升一成。
今潮工業股升勢，由創科（669）及德昌（179）等股份帶起，之後連裕元（551）、德永佳都升埋，係反彈定係轉勢？基本上，工業股同國企股唔同，行業好，同樣係鋼鐵股或者航運股都有得炒，但係做工業，即使同行，管理同經營能力都可以差好遠，同類股好難一齊炒。
同樣係工業股，建滔化工（148）噚日忽然出現大陰燭急跌，成交倍增至1.7億元，為乜忽然被洗倉？如果要搵同業比較，佳邦環球（471）上月才發出盈警，表示由於過去幾個月經營傳統硬性印刷線路板（PCB）的環境遇到困難，客戶定單價格及數量下降，在本年度餘下期間，PCB業務將仍然艱難，故目前的經營業績可能無法與過往相比。
建滔同佳邦要勉強比較，對建滔似乎有欠公平，但係若然佳邦都話行業經營環境欠佳，應該有啲理據。炒工業股，要花嘅時間同精神，絕對比炒其他大路中資股為多，唔係咁易搵食。