每年同班死黨睇聖誕燈飾固然開心，但如果要我左手抬住腳架，右手揹相機嘅話，除咗一個「苦」字，已經諗唔到有任何快樂可言！不過，今年聖誕比較幸運，手上只係揸住一部手機就夠「照」，500萬像、Xenon閃燈、防手震……本應喺數碼相機出現嘅功能，通通搬落手機；更難得嘅係，高中低檔價錢邊一瓣都有，我就睇中咗９款喇，你呢？
記者：陳國輝
攝影：周旭文、陳盛臣
Model：Maggie、Victoria
影燈飾五大忌
拍攝維港兩岸嘅燈飾，咪以為帶住部有閃光燈嘅影相手機就實食冇黐牙？錯喇！原來影夜色都幾考功夫，如果唔曉運用手機入面嘅微調功能，結果一樣會出現「鬆、郁、矇」！
背景又黃又藍
基本上白平衡係當背景色偏黃或偏藍嗰陣，用嚟調校色彩嘅工具，唔想臉色難睇，可以喺「白平衡」一欄選擇自動、晴天或陰天，任何燈光都啱用。
人像膚色暗啞
第二個死症，係當人企喺燈飾下面，膚色會變得暗啞無光，全因為背光所致！因此影嗰陣不妨調整吓曝光補償值，或開啓相機閃光燈先影。
燈光太強人太暗
與燈飾合照的另一問題，就係當燈光過於強烈，同時人就會更暗！呢個時候不妨試吓調校對比度，部份SonyEricsson的手機已配備PhotoFix功能，有類似作用。
環境太黑搞唔掂
當你企喺碼頭想拍攝對面海嘅燈飾時，有可能出現環境光度唔夠嘅問題，但又唔用得閃光燈。此時可嘗試調校ISO來彌補光度不足，但唔係咁多手機有呢項功能。
突然患上紅眼症
用閃光燈最常見嘅問題係人像產生「紅眼」，如果手機配備Xenon閃燈應提供埋防紅眼功能，但筆者試過幾款手機卻未必做到百分百防紅眼。
試相區
$4,000+：夜攝好過拎DC
快靚正！N82即拍定位
500萬像雖非首次，但追加咗Xenon閃光燈、曝光補償及ISO功能，夜晚影燈飾就唔使煩。影完相，仲可利用GPS自動儲存經緯度資料，方便第時喺網上flickr慢慢欣賞之餘，更可記低每張照片嘅拍攝地點。
iPhone最潮相簿
鬥像素，iPhone拍馬都追唔上，但鏡頭質素都唔失禮，最正係貪佢個芒達到3.5吋闊，更可利用Multi-Touch功能將相片放大、縮細、旋轉，喺現場即時影即時睇，勁過一般電子相簿多多聲。
G800三倍光學
平安夜或之前一個禮拜，想人少少影燈飾幾乎冇可能，專業攝影師當然帶定支長鏡搵靚景，不過G800亦具備三倍光學變焦，500萬像素仲配埋防手震專用掣，即使個人唔夠光或者距離燈飾太遠，都有得補鑊。
$3,000＋：功能齊花臣多
罕見！KU990備慢鏡特效
綽號Viwety，KU990亦係LG旗下首部500萬像影相手機，具備防手震、ISO800等專攻夜晚拍攝嘅模式，對付夜景綽綽有餘。最勁係慢鏡攝錄功能，一秒鐘錄製120格動畫，即係Normal的4倍之多。
K850i型藍夠照
配備500萬像素之餘，最重要係K850i玩型格Feel，全鋼琴黑機面帶點拋光，最靚嘅地方係數字鍵中間仲有一條藍色或綠色光環「照」住，聖誕夜拎出街零舍型，鏡頭部份亦有蓋保護，唔易刮花。
N81直出電視
影相非N81耍家功能，但佢配備的TV-Out插槽，當你影完相或攝錄咗短片之後，拎到返屋企就可以經手機將入面內容經電視顯示出嚟，啱晒一班朋友齊齊睇，同時仲支援N-Gage，帶佢出街實唔怕悶親。
$3,000－：扑聲Day送禮實際
G600最抵500萬像
芸芸高像素機款之中，以SamsungG600最抵玩，唔使$2,500就配備500萬像素，更採用自動對焦，曬激大8R相框起擺床頭都冇問題。不過影夜景就欠一盞強勁閃光燈，配備的LED燈只能當一支電筒仔用。
最平！E590唔使千四蚊
講到價錢最抵，而影相質素亦算合格嘅機款，SamsungE590都可謂當之無愧。佢可以話係LowEnd機之中像素最高嘅型號，達到320萬像，仲可以按半下做自動對焦，加埋專用微距拍攝掣，影乜都得。
K770i夠薄放衫袋
同樣配備320萬像素嘅K770i，重點在於機身夠薄，得14.5mm，高像素影相手機中甚為少見。至於內置的PhotoFix功能，可以把相片中偏光或偏暗嘅部份調校，令光度變得平均。
（a）T-OneMobile（26299090）
（b）LikeTelecom（23953777）