金管局總裁任志剛噚日應該好好興致，佢除咗出個啞謎，等大家趁聖誕假期估吓邊家銀行業績會見紅，仲喺金管局網站自己個專欄《觀點》度同大家玩填字遊戲。
大家睇咗題目，然後將答案填上，最先遞交而答案又全對嘅話，就可以攞走一份聖誕小禮物。
貼士請在《觀點》內找
華華當然身先士卒、當仁不讓，第一時間上網玩，嗱，咪話華華唔提醒大家，填字遊戲嘅內容，同呢一年嚟任總喺《觀點》內提過嘅一啲金融用語有關。
例如任總提過一個市場發展時，用「猛虎不及地頭蟲」嚟形容，呢個市場發展係乜呢？QDII中文全名點叫？內地負責監管銀行嘅機構簡稱係乜？銀行嘅資本基礎同埋佢嘅風險加權資產比率係幾多？
唔識答？唔緊要，因為任總個專欄有晒答案，只要肯搵一定搵到。任總今次益街坊，都係拋磚引玉，希望大家睇吓佢個專欄，學多啲金融知識。
個遊戲呢個月27號就截止，有興趣嘅可以到呢個網站睇吓
http://www.info.gov.hk/hkma/。