自細就覺得聖誕節係一個開心甜蜜嘅節日，之不過每年聖誕節一係唔出街，出親街就人多車多逼到無晒心機。其實只要花啲心思，平平哋租部車仔，無論兩口子、成家人又或者大班朋友都可以唔使逼，一樣有大把好地方！今日就同大家搜羅港九大小靚景，仲好似神戶牛柳咁分埋級數畀你揀，等大家輕輕鬆鬆睇燈飾，兼過番個甜蜜又溫馨嘅聖誕！
記者：梁美甜
攝影：譚盈傑
模特兒：Penny（TheGroup）、Joanne
場地提供：海港城
港九免逼必睇位 浪漫指數爆燈
有部車就無必要揸入去尖嘴、銅記塞車，醒大家港九幾個揸車去到嘅靚點，唔使逼又可以睇盡靚景靚燈飾。
（*五星為最高）
HongKong
港島區
天后夠靜 夜景夠靚
港島區肯定係銅鑼灣最逼最多人，其實行過少少到天后嘅京華街同油街，一樣有靚景兼且夠靜，拍拖必到！由電器道轉入京華街停車場，時租$7，無遮無掩望晒對面尖東同左面中上環燈飾。停車場爆晒大可去隔籬油街倔頭路，個景一樣咁靚而且費用全免，不過可能要走鬼。
浪漫指數：☆☆☆☆
靚景指數：☆☆☆☆
寶馬山最浪漫
沿寶馬山道、慧趣路直上，過咗樹仁大學就到。呢個位夠隱密，幾盞昏黃街燈Mood到痹，情調一流。
浪漫指數：☆☆☆☆
靚景指數：☆☆☆
中環IFC望得清
中環IFC對開嘅港外線碼頭都可以停吓車睇景，對面中港城同天星碼頭一覽無遺，但停車地方少兼人多。
浪漫指數：☆☆
靚景指數：☆☆☆
舊北角碼頭旁
喺北角渣華道上東廊前、臨近鰂魚涌有幢嘉華國際中心，雖然燈飾唔算壯觀，但勝在錶位夠多兼夠靜。
浪漫指數：☆☆
靚景指數：☆☆
Kowloon
九龍區
西九龍海濱長廊
九龍區最正景點係未來文化發展重地西九龍一帶，由柯士甸道西入喺圓方商場對開有個爛地停車場，$5一個鐘可以飽覽對面港島由西環至銅鑼灣沿海景色，靚到暈！再唔係可以駛過啲沿指示牌入西九龍海濱長廊盡頭嘅咪錶場，有規劃兼喺沿路設置大型風鈴燈箱，聽住風鈴聲邊行邊睇景，浪漫到似拍戲。
浪漫指數：☆☆☆☆☆
靚景指數：☆☆☆☆☆
黃埔紅磡碼頭
黃埔紅磡碼頭景觀最正，兼有條黑麻麻幾有情調嘅海濱長廊拖手仔散步㖭，附近有住宅有酒店，人就多啲咁喇，合家歡就早啲到，想浪漫嘅咪夜啲趁燈飾未熄至去囉！泊車可以泊入海濱廣場又或者吉之島時租停車場；前者近海旁但收貴啲，平日6點前要$28一個鐘、6點後同五、六、日、假期就$14個鐘。吉之島停車場就遠啲，平日每小時$16，周末假期就$18，買嘢仲有泊車優惠㖭！
浪漫指數：☆☆☆☆☆
靚景指數：☆☆☆☆☆
最平幾百蚊租一日
聖誕節出街食個聖誕大餐起碼一千蚊，再行吓街睇吓燈飾逼吓咁就一晚，Honey又嫌行貨又嫌貴。其實想𠱁人都可以租番架車仔，兩個人抑或成班人都一樣得，如果係開篷車單係遊車河都似足MTV主角，唔使食大餐食個包都冧爆啦！
情人甜蜜之選
福士Golf2.0開篷跑車
價錢：日租$1,000/星期租$4,600/聖誕周末4天套餐$2,860
大班朋友WeWet
NissanTiida四門房車
價錢：日租$490-680/星期租$2,380-2,800/聖誕周末4天套餐$1,950
合家歡溫馨之選
ToyotaAlphard七座MPV
價錢：日租$1,600/星期租$6,800/聖誕周末4天套餐$4,940
手續方便快捷
只要有2年車牌（國際牌都得），年過25歲又有住址證明就租得車。想預早Mark定心水車嘅咪早啲打個電話、傳真又或者上網預約，最直接當然係親自上租車公司辦手續喇！
套餐以「星期租」最抵
聖誕及除夕周末Package，周末攞車玩足四日，價錢由$1,690起，抵玩過日租。租車嗰陣會跟埋張油卡，喺指定油站入油會有折扣，慳唔少㗎！
查詢：大昌行汽車租賃服務（27682277）
提提你：大車小心睇位
若然租架車尋開心，整花咗要賠錢就認真掃興，所以要格外小心，尤其人多車多嘅節日，轉彎同泊位時，頭尾泵把位同兩側角位最易揩花撞凹，人多租大車就更要小心睇位。
體貼3招添氣氛
想同Honey過甜蜜難忘嘅聖誕好簡單，遊車河之前花少少心思，準備點小工具就掂！
絕招1 情趣佈置
未必有人上門，屋企都會佈置一下，更何妨係至愛嗰個，花少少心機搵啲聖誕飾物好似彩帶、聖誕花同吊鐘咁掛吓，氣氛又濃又Warm，第一眼睇到已經加晒分啦！女仔怕凍，預備定暖包外套同紙巾，一個乞嚏即送上紙巾同外套，直頭暖到入心，唔使睇燈飾都已經冧爆！
絕招2 浪漫情歌
氣氛呢樣嘢係要營造嘅，所以預備幾隻應節聖誕歌之餘就一定有冧歌，遊住車河聽情歌，以為自己做咗故事主角，Honey冧到柔情似水。小朋友聽到熱鬧聖誕歌，變歌手開Concert都未定㖭！
絕招3 應景電影
有時都可以靠他人幫你營造甚至提升氣氛嘅，有啲車有DVD音響設備又或者自備個Portable都得，嚟隻浪漫冧爆電影《真的戀愛了》咁，靜靜哋二人世界依偎睇戲，夠晒Sweet。
HMV網址： http://www.hmv.com.hk
海港城泊車優惠
海港城每年都花心思整靚長樓梯同走廊嘅燈飾，今年更以雪人配雪花同星星做正門嘅大型燈飾，加埋100呎長機動燈飾長廊，絕對係合家歡至正之選。門口上方大電視仲首次播3D聖誕短片，不過要做$20善事換副立體眼鏡至得！鬧市過熱鬧聖誕都好着數，因為海港城喺12月8至30日期間逢星期六、日消費滿$200或以上，可獲2小時免費泊車，外加送多兩張「1小時免費泊車證」。泊完車仲可以順便喺停車場居高觀賞埋維港景色，FreeofCharge嘅！
海港城查詢熱線：21188666
話你知：政府最新交通報告
查詢熱線：1823
網址： http://www.td.gov.hk/traffic_notices/index_tc.htm