那個男人不想化身韋小寶，坐擁7個靚老婆？論條件，阿旦鄭丹瑞應不及韋爵爺一半，但造物弄人，偏偏身邊靚女拍檔多。80年代出品的《小男人週記》是集體回憶，阿旦將它重新搬上舞台，飾演他情人的姣精陳法拉，掀起周記新一頁，也讓我們憶記美人絕色。
阿旦的7個女人，有令他一眼想擁有、具烈酒feel的關之琳；讓他驚震的夢中情人鍾楚紅；小鳥依人又敬畏的嘟嘟鄭裕玲；被他鬧喊過但又陪他睇戲的蔡少芬……
「鄭丹瑞，你係邊個啫？」他自量，行動不越軌、思想不釋放，「今生今世都係呢個老婆，治到我嘅女人。」這個女人叫沙律，是他滿布線眼的正印老婆。
做韋小寶？風流代價太大，自認天生孤寒的阿旦，計落條數，都是做小男人實際。 撰文：朱倬誼
朋友甲說：「喂，阿寬50歲，佢條女點都40歲啦，你搵陳法拉？唔係呀？」鄭丹瑞答：「係！呢個就係好玩嘅地方。」
阿旦和新一代索女陳法拉合演舞台劇《小男人週記》之《Kissmegoodbye》，他演阿寬，法拉演他前度情人Rosa，老實說，恨死隔籬，53歲的阿旦平凡如斯，都可以艷福無邊？挾小男人之名，他夥拍過不少大美人，連他也說：「到今時今日我都望住呢張相，有鄭裕玲、鍾楚紅、李美鳳、關之琳，最靚嗰幾件。鄭丹瑞，你係邊個呀？死𡃁仔，DJ出身咋喎！」
法拉吸引辣舞傾情
當年阿旦演繹阿寬，這個小男人對靚女又要睇又要驚，現實中美女拍檔在阿旦身邊氹氹轉，他視為樂事，但會否越軌呢？他居然要計數，跟阿寬似極。
「我做咗呢行咁多年，緋聞都埋唔到身，何況我老婆啲線眼都係同我共事嘅人；又可能係我嘅天生孤寒去唔到思想釋放，我比較理性，咪住先！如果我要老婆以外嘅感情，要付出幾多物質上嘅嘢？計落覺得條數唔抵，費事諗啦，諗個劇本會進取啲，去諗點樣媾女？我又多數媾唔到嘅，嘥晒啲時間。」
阿旦拍戲產量不多，但戲中貌美妻妾一大堆，就算全部眼看手勿動，都抵啦。他和法拉在舞台劇合跳辣身舞，被她辣一辣之後，阿旦讚到她飛天：「我唔識跳舞，希望佢帶動我，佢要度一隻舞，佢排得頭頭是道，好專業、好放、好叻女、好肯學，演繹角色後主動畀意見，好到不得了，我覺得陳法拉將會大放異彩。去到呢個moment我都仲係話畀你聽，我好欣賞佢。」人人說法拉姣，他卻為伊人力撐：「佢係有吸引力，但同姣扯不上關係，雖然我同佢唔熟，但必須同佢平反，我望到佢係個可塑性好高、好有潛質嘅未來花旦。」
獨對紅姑快樂到死
89、90兩年，阿旦接連拍了兩齣《小》片，先夥令他驚到震的鍾楚紅，後有令他一眼想擁有的關之琳，他快樂到死。「紅姑係女神，我嘅夢中情人，佢應承拍《小男人週記》係好驚，我驚嘅原因係——佢終於喺我身邊！唔識handle，點算？有場戲講我哋困喺office嘅影印房一晚，佢竟然同我做呢場戲喎，好驚㗎！
「關之琳係烈酒，一眼就想擁有，要攬得佢好緊，佢會畀到你好romantic嘅感覺，佢好似今日嘅陳法拉，好索、好正！我對於呢啲女人要好珍惜，佢可以同劉德華拍戲，點解要選擇鄭丹瑞？你唔可能有非份之想，係得來不易。」
92年阿旦首執影筒開拍《吳三桂與陳圓圓》，女主角是嘟嘟鄭裕玲，他大讚嘟嘟專業程度冇得頂：「當年我帶住敬畏嘅心情同佢合作，我哋去加拿大拍外景，佢有場戲同加拿大特約對答，個特約見到鄭裕玲已經騰晒雞，NG兩次之後，鄭裕玲好冷靜咁望住佢：『唔使驚，我話畀你聽，我唔係姓鄭，我姓溫，叫溫剔玲（『onetake玲』諧音，指拍戲一take過），已經三個take啦！』，其實佢講笑，希望對方交到貨，有呢啲演員推動，係我嘅福氣。」後來嘟嘟跟呂方拍拖，阿旦每月上她家打牌，看見嘟嘟呂方甜甜蜜蜜，他也戥老友高興：「嘟嘟小鳥依人㗎，喺愛情魔力下，佢係另外一個人，你估唔到㗎。」
把口衰鬧喊蔡少芬
翌年阿旦拍無綫劇集《金牙大狀》，卻曾當眾鬧喊拍檔蔡少芬，「嗰時佢啱啱出道，拍劇NG，我好鬼勞氣，佢拍咗4、5個take，睇完playback之後，『導演可唔可以嚟多次呀？』我喺隔籬話『你嚟多次都係咁㗎啦！』，我講笑咋，佢就喊啦！我同佢saysorry，我把口係咁衰，但因為咁大家做咗好朋友。
「幾年前佢拍咗部福音電影《天作之盒》，請我睇首映，我嚟到現場，佢坐我隔籬，陪我睇晒成套戲，我覺得好感動。我睇住一個俾人話乜嘢生日豪花100萬嘅女仔，一路咬住牙關，做畀你睇其實佢係一個乜嘢人，大家無話可說啦！我好開心，見到佢進步咁大，我生日、有乜節日，佢都有sms，好warm，我哋冇話約食飯，但大家心照，嗰種感覺幾好。」
去年阿旦和伍詠薇在處境劇《高朋滿座》中飾演夫妻，又是另一番感覺。「好少有伍姑娘呢啲咁開心嘅十三點又咁charming嘅女仔，佢好活潑開朗，同佢拍《高》劇有夫妻感覺，雖然係喜劇，但有幾場戲都要用感情，係互相影響，見到你眼有淚光，大家有交流。佢嫁咗都真係甜蜜，老公成日去外景探班，佢一見老公就開心，係個好幸福嘅女人。」
今生只愛太太一個
正印太太沙律，和阿旦結婚26年了，他說一生只愛她一個：「我今生今世都係呢個老婆，佢係治到我嘅女人，我哋由學生時代識到𠵱家，佢見證過我嘅upanddown，永遠喺我身邊鼓勵，令我無後顧之憂。以前佢好鍾意旅行，好鍾意見識，但生咗兩個女之後，係全日24小時，瞓瞓吓會起身幫兩個女、老公冚被嘅女人，到今日都係咁，仲想去邊度搵呀？」
攝影：葉君海
服裝、場地：BrooksBrothers
