1.星期六13樸茨茅夫vs熱刺
波膽：2:1
信心指數：★★★
周中提供利物浦對愛華頓成功過關，而愛華頓能勝其實與韋斯咸完場前失誤有莫大關係，這亦是足球比賽，其中一個賽前唔容易預測的因素，而韋斯咸今日在聯賽再對愛華頓，我仍會傾向愛華頓，但信心唔及周中聯賽盃，所以未有將「拖肥糖」放入貼士欄內。
熱刺防線如豆腐
今周英超有難得一見的超級賽程，4大球會互相對壘，對球迷來說肯定是值得期待；但唔代表係落注好時機。既然球迷個心已經去咗阿仙奴同利物浦度，而我就決定去樸茨茅夫的主場搵食。
老樸對上3場聯賽主場賽事，都只能與對手互交白卷，似乎無乜說服力；不過，今次對住後防在聯賽數一數二差嘅熱刺，就值得捧場。睇番資料，原來熱刺自7月起，已有逾30場波，未試過出現0:0戰果，即係話有佢哋份嘅賽事就必定有入波。再睇埋伯明翰都可以在佢哋身上入3球，而安德列治同阿爾堡在歐洲足協盃對熱刺，同樣可以製造多個入球機會，好難想像熱刺可以在比賽力保「清白身」；最重要仲係熱刺今季踢咗8場作客賽事，都仲未開到齋。
反觀主隊老樸目前為止，16場聯賽射入28球，只係唔及阿仙奴、曼聯等強隊，雖然近3場主場只係踢成0:0，但事實上對住愛華頓、韋斯咸同曼城，3場波都佔盡優勢，強如曼聯同利物浦到訪都只係攞得1分，而老樸今季主場亦僅於聯賽盃嘗1敗。再者，老樸並無新的傷兵，攻擊球員狀態又「弗」，熱刺肯定冇運行。
還有一點要注意，熱刺並非一支擅守的球隊，如臨場主動與老樸搶中場，那麼老樸領隊哈利列納肯定會好開心，若論搶截力與反擊速度，肯定勝熱刺一籌，到時可能有好多轉守為攻的入球機會。
2.星期六10伯明翰vs雷丁
波膽：1:1
信心指數：★
兩隊的後防，同樣講得上「海軍鬥水兵」，當中辛高在陣與否，對雷丁的後防舉足輕重，而佢哋能否踢回上場主場對利物浦的水準，我個人就抱有好大的疑問，始終佢哋作客表現確實難以予人信心。
3.星期六11打比郡vs米杜士堡
波膽：0:1
信心指數：★★
米杜士堡上輪爆冷擊敗聯賽「1哥」阿仙奴，令球隊的信心指數急升，再加埋佢哋近兩場作客賽事分別賽和保頓同雷丁，表現出唔錯嘅水準，加上米堡季內16場聯賽合共有102次射門命中目標，遠勝打比嘅64次，故今周決捧米堡。
4.星期六12曼城vs保頓
波膽：1:0
信心指數：★
曼城每逢有艾蘭奴上陣，球隊就踢得特別醒神，呢位巴西中場，可望趕及於今日主場對保頓一仗復出，牌面佔優；至於保頓近排表現的確進步好多，但曼城今季主場全勝，相信保頓好難成功偷雞。
5.星期六14新特蘭vs阿士東維拉
波膽：1:3
信心指數：★★
新特蘭主場挫打比郡，可以講係大話夾好彩，還充份反映佢哋實力有幾脆弱。反觀維拉上場輸畀樸茨茅夫，只不過係佢哋今季以來首次連敗，而我好有信心奧尼爾，可以帶領維拉在光明球場全取3分。
6.星期六15韋斯咸vs愛華頓
波膽：0:1
信心指數：★
兩隊繼聯賽盃8強後，短時間內再次交手，而我仍然睇好莫耶斯領軍的愛華頓。「拖肥糖」踢法硬淨唔易對付，而韋斯咸開季至今從統計及表現看，作客反比主場為佳，這與球隊擅穩守有關，今場主場再對愛華頓並不樂觀。
7.星期六16韋根vs布力般流浪
波膽：0:2
信心指數：★★
布力般的賓尼同沙維治復出，加上今季作客只係輸過一次，係我力撐布力般嘅原因。韋根新任領隊布魯士接掌球隊無耐，經已諗1月轉會市場入咩貨，擺明係唔信任現有的球員，嚴重打擊隊內士氣，相信韋根短期內不是可捧對象。
8.星期六44富咸vs紐卡素
波膽：1:1
信心指數：★★
呢場波嘅勝負稱得上高深莫測，皆因兩隊的近況都係「走晒樣」。富咸冇贏波的本錢，而紐卡素極之飄忽的表現又確實靠唔住，預計雙方和氣收場，各得1分。
9.星期日9利物浦vs曼聯
波膽：0:2
信心指數：★★
利物浦在周中精銳盡出，確保球隊繼續在歐聯前進，大戰過後難免有些少放鬆。而曼聯差唔多以全副選鬥羅馬，養足精神準備晏菲路的硬仗，紅魔體力準備十足，睇好佢哋響勝鼓。
10.星期日21阿仙奴vs車路士
波膽：1:0
信心指數：★★
阿仙奴主力得到一星期休息時間，中場亦有法米尼回歸，而前線方面尹佩斯亦已在周中的歐聯復出，中前場配合更完整，而車仔缺少杜奧巴，單踢舒夫真高一個略嫌唔夠速度，故有點信心阿仙奴可小勝。
註：以5★為最高
「暢譚英超」周末推介（12月份）
主客和：
星期六13樸茨茅夫勝（2.1）@500
主客和3x4：
星期六11米杜士堡勝（2.25）x
星期六14阿士東維拉勝（2.2）x
星期六16布力般流浪勝（2.2）@200
主客和2x1：
星期日9曼聯勝（2.7）x星期日21阿仙奴勝（2.3）@200
全日投注：1,500分
上次賺蝕：1,951分
累計結餘：89,734分
規則：全季底分為100,000分，每次最多投注2,000分，以周二及周六見報貼士計。
譚拔士
5屆香港神射手，在效力南華及東方合共射入超過200球，被譽為歷來最佳外援中鋒；現於英國skybet任公關主任及足球博彩節目主持。
電郵：mailto:[email protected]