《金手指》一欄其中一個功能，就係為大家問啲大家好想問，不過因為你哋有修養，所以唔問嘅問題。今日，又係時候孫柏文擔起呢個社會責任。
我想問：「老老實實。任總，究竟邊間銀行賴咗嘢？」相信有如早前我為大家問財政司司長曾俊華，點解要入股港交所（388）一樣，任總應該音信全無。
令我非常不安
如果你唔知點解我要問金管局總裁任志剛以上嘅問題，咁我就要搵番嗰塊封晒塵嘅「笑聲拍板」出嚟，大大力拍吓你個頭。因為任總佢老人家，噚日喺大家食晏時，走嚟同啲記者講話：「大家要有心理準備，有間「本地」銀行因為次按賴咗嘢。」
孫柏文睇到嗰段話時，就係食緊飯盒。任總叫我有心理準備，我只可以話，嗰啲喺我部電視機上嘅飯粒，已經證明我冇呢種心理質素。任總嘅一句說話，令我非常不安。一向以來，我仲估啲喺公仔紙幣世界裏面做央行行長嘅人，首要條件就係要喺乜嘢情況之下，都唔可以令人對銀行體制不安。唔可以製造uncertainty。唔通，就快要放棄同美元掛鈎，行番1935年之前嘅銀本位silverstandard？
使唔使咁絕啊
任總唔講邊間賴咗嘢、唔講間嘢因次按輸咗幾多，淨係要我哋有心理準備。頭先已講過，心理準備我就冇。不過，任總引發市民嘅「準備」，輕則就係股民合埋眼，見「本地」銀行股就沽。嚴重就令我，如果收到匿名sms，分分鐘走去我幫襯嘅銀行，即時擠提。仲因為唔怕一萬最怕萬一，將sms立刻傳寄畀所有我識嘅人。
任總，你就算要迫啲銀行表態，都唔使咁絕啊？真係好不安呀！
金手指網誌： http://phatdat.blogspot.com