阿Deep除咗留意韓國娛樂新聞外，都知道南韓將喺下星期三（19號）舉行總統大選。喺呢個大日子，有網民就設計咗多張候選人嘅海報，不過參選嘅並唔係大國家黨或者大統合民主新黨代表，而係一眾韓國明星！
每位候選明星唔單止有黨派，就連政綱都寫埋，不過內容就有啲亂嚟。好似8號候選人、來自韓國sexy黨嘅李孝利，就話要建立一個性感嘅新世界，唔通國民都要整到好似佢咁好身材？至於3號嘅韓藝瑟就提出「藝人政權交替」，都好鬼無厘頭。靚女金泰希嘅政綱係要同國民創造一個美麗世界，佢嘅參選冧巴係1號，阿Deep都睇好佢係大熱人選。2號嘅參選人韓佳人早已嫁畀藝人老公廉政勳，所以佢就好關注一眾師奶，要主婦活得開開心心喎。
其餘仲有主張快啲結婚嘅SeeYa成員南貴麗，同埋代表親日派嘅女歌手Younha等。至於11號嘅候選人李珉宇（MinWoo）有首歌叫《TheMStyle》，所以政綱係「經濟要MStyle，教育要MStyle」。如果佢哋當選，阿Deep都唔敢估計韓國嘅將來會係點囉！
版主：網盜王尊尼Deep
本欄逢周一至五刊出
網址： http://kr.fun.yahoo.com/NBBS/nbbs_view.html?bi=1201&bt=2&mi=648397
網址： http://kr.fun.yahoo.com/NBBS/nbbs_view.html?bi=1201&bt=2&mi=646653