明年北京主辦奧運，香港協辦馬術大賽，中港會互相配合將呢件四年一屆嘅盛事搞到有聲有色。劉德華嘅公司今年特別印製咗一批座枱月曆送畀友人同客戶，翻開一睇，12個月嘅相，係華仔以12種唔同運動造型示人，食住timing，大玩奧運feel。
呢輯相中，華仔除咗有打網球、跑步、打高爾夫球外，佢仲將打保齡呢樣個人強項都包羅其中，當然姿勢非常正確啦。
優先訂票座位差
另外，華仔下周五（21號）起會喺紅館舉行一連16場跨年演唱會，由於銷情緊張，雖然華仔加咗場，但啲飛好早已經賣晒。
近日有讀者李小姐向本報投訴，指佢哋係華仔天地會員，雖然透過申請AIG信用卡買飛，承諾嘅最佳位置竟然係好差，李小姐噚日喺電話話：「咁樣訂飛，每張仲要收手續費16蚊，位置竟然係第9行之後，我買同場6張飛，佢哋又3張3張唔同行分畀我，好過份，係咁使乜優先訂票，我排隊啲位可能仲靚啲。」
