歐美大銀行平時以人才多而自豪，因佢哋肯畀高薪，兼且夠名牌，歐美最叻啲畢業生，MBA都以加入大銀行為願望。既然收埋咁多叻仔叻女，又有過百年經驗嘞，點解呢次會畀次按風暴打到一仆一碌，人仰馬翻呢？特別係瑞士人以保守見稱，瑞士銀行係穩健經營嘅世界典範，全世界大富豪都有一個瑞士戶口，點解瑞銀（UBS）突然要為次按債券撥備又撥備，最新撥備係一百億美元，搞到○七年全年會冇錢賺，仲要搵新加坡政府與中東基金注資呀？
一字記之曰貪（greed）。貪利潤，貪追求利潤增長也。過往商業銀行與投資銀行有分別，河水不犯井水，前者靠穩陣，後者靠聰明，前者搵長線，後者走短線，涇渭分明。但因為舊時中小公司隨住經濟發展不斷增長，變成大公司，業務範圍擴大，唔需要問商業銀行融資，反而需要投資銀行幫手上市，發商業票據，發債券，配股集資，於是商業銀行見到一養大個客，就冇生意做，心有不甘，亦轉型做投資銀行業務。呢個情況在八十年代開始，現在啲大銀行已經好難定性係商業銀行還是投資銀行。
大家鬥搶生意之下，乜嘢新產品都嘗試吓，邊隻產品有錢賺，就一窩蜂咁去搶，只有超級高手如高盛先至叫做睇得通，避開次按災難，繼續賺大錢。其他啲商銀、投銀，或多或少都畀次按害親。叻仔叻女在銀行內首先睇住自己份年尾花紅，為花紅而爭利潤，爭生意，風險反而唔顧得咁多咯。投資銀行如美林，基本薪酬唔算高，新CEOJohnThain好似只係得七十萬美元年薪，好多職員年薪只有十幾二十萬美元，但係計埋花紅、股權之後，CEO嘅一年薪酬往往有幾千萬美元。試問所有投行嘅叻人點會唔口頭講控制風險，實際就搏命炒賣、搏命搶deals吖。
次按風暴過後，應有一兩年靜寂期，收拾殘局，講吓風險管理，但之後利潤壓力又嚟嘞，各銀行會心思思推出新產品，一於再炒過，適逢其會者發大達，搭尾班車者再次輸到眼光光，歷史不斷重演。