特首文革曾有句街知巷聞嘅連任口號：「我會做好呢份工。」"I'llgetthejobdone！"原來口號仲有下文，但係從來冇公開，只喺政府內部下達。八方獲得機密消息，口號下文係：「做好份工都仲有人嘈喧巴閉，咁就左耳入、右耳出，唔使理佢！」哦，唔怪得香港2012雙普選無望，唔怪得天星同皇后要拆，唔怪得老人家嘅生果金冇得加啦。
左耳吸收 右耳排泄
文革曾呢道「聖旨」喺今年7月發出，即係正式連任後冇耐。有一日，佢去咗土木工程拓展署總部巡視，其間佢發表重要講話，唔使錄影，即場爆肚。聖訓嘅內容係：「你哋班公僕，唔使為咗越來越多嘅公眾投訴同批評而感到低落，若然你哋已經做好咗份工，都仲收到投訴人無理嘅強烈抗議，咁就忘記咗佢，左耳入，右耳出。」
為方便基層公僕學習呢個偉大思想綱領，作為處事金科玉律，據知有關方面已簡稱為《投訴當係耳邊風》，並以英文收錄咗喺土木署嘅部門通訊裏面，全文如下："Ifyoureceiveanunreasonableoutcryfromacomplaintandyou'vedoneyourjobwell,forgetitbyaleft-ear-in-and-right-ear-out."
文革曾當日競選連任話會做好呢份工，原來背後有個咁灑脫、咁不屑反對聲音嘅管治理念，八方拜讀後終於恍然大悟，即係話只要係文革曾自以為做得好嘅施政，無論市民點示威抗議，佢都會聽，不過係扮聽，呢頭喺左耳吸收，嗰頭用右耳排泄出嚟，堪稱獨裁政治家漠視民意至高境界。
文革曾當民意係耳邊風，咁佢最好勤啲清潔耳朵，否則大量反對聲音入耳，塞住出唔切嚟後果堪虞，輕則仆低，重則腳痛，都係企唔得耐徵兆。文革曾要強政勵治，佢金口頒令《投訴當係耳邊風》聖旨，公務員實聽得入耳。
事實上我哋班公僕一向識撈，當日文革曾巡視土木署，有位工程師買咗條新呔執正迎聖駕，點知臨時收到風，特首當日casualwear唔打煲呔扮親民，成班高層即刻除西裝除呔配合。類似埸面喺幾年前溫總訪港探訪威爾斯醫院時已有前科，當日溫總只着恤衫西褲，楊永強、高永文等高層即時寬衣陪總理做親民騷。