八方噚日話ATV新聞小花一件衫孖份着，唔少讀者都嘖嘖稱奇，香港周街都係時裝店，款式繁多，買件衫上鏡有幾難？點解會撞衫㗎。其實，八方初時同大家嘅反應都係一樣，直至有資深電視主播迷向八方展示一件「主播戰衣」，終於令八方相信，女主播買衫可能真係好難，連唔同台女主播都撞衫！
「主播戰衣」賣百幾蚊
呢件「主播戰衣」係件黑色外套，配粉紅色綑邊，驟眼睇唔算好特別，竟然吸引咗郭詠琴、陳佩琳及繆美詩三位靚女主播一人買一件，絕對唔係share着㗎！首先，fans話郭詠琴喺ATV任職時已開始着呢件戰衣，過檔TVB後唔嫌棄，依然着住上鏡；同一時間，ATV一姐主播陳佩琳，都有着住呢件戰衣報道新聞。
至於由新聞界過檔領匯做公關大員嘅繆美詩，一樣難逃fans法眼。有fans喺新聞片段中發現繆美詩雖然唔做主播，但依然鍾情呢件「主播戰衣」，原來三個女主播衣着品味咁接近，件外套堪稱經典「主播戰衣」，有人話呢件「主播戰衣」係某連鎖時裝店出品，賣百幾蚊啫。