蔡卓妍（阿Sa）為無綫拍攝的節目《阿Sa真人Show》，日前播出首集後，阿Sa即被網友批評得體無完膚，她前晚出席新戲宣傳活動時，強調自己拍這個節目沒收錢，她說：「我有啲唔開心，因為播出嘅畫面只係一部份，好多嘢大家睇唔到，因為剪咗去。」明顯埋怨無綫將節目剪得支離破碎，令她慘成箭靶。
無綫於周日晚（9日）首播的《阿Sa真人Show》，節目概念被指抄襲美國大熱節目《TheSimpleLife》，同樣以真人騷作招徠，美國版本由富家女ParisHilton跟NicoleRichie打工為主題，盡顯二人的無知及嬌縱，而剛播出的《阿Sa真人Show》則找來蔡卓妍與張致恆（Steven）到豬場工作，由攝製隊將整個過程拍下，務求將阿Sa最真實的一面呈現在觀眾眼前。
認嘴藐藐
「冇人踩屎會feelhappy」
可惜節目播出後惹來劣評如潮，大批網友直指阿Sa嬌生慣養，還列出她四宗罪，包括不尊重農夫工作；勞動期間忽然補妝兼搽花露水，太過姿整；當Steven手指受傷後，阿Sa未有關心他，欠缺同情心；還馬上指使Steven工作，態度散漫。前晚阿Sa、周杰倫和陳柏霖在銅鑼灣為明年2月7日上映的賀歲電影《功夫灌籃》宣傳時，就網民力數她的四宗罪回應說：「覺得今次拍呢個節目係自己體驗，因為我讀完書第一份工就係入娛樂圈，好多嘢未體驗過，呢個節目拍咗3日，個節目得半個鐘，廣告又去咗10分鐘，實際剪埋得20分鐘，有啲嘢大家睇唔到，咁電視台一定要剪最啜核同最好笑嘅畀觀眾睇。」
阿Sa續說：「自己有啲唔開心，因為播出嚟嘅畫面只係一部份，好多嘢大家睇唔到，因為剪咗去。」對於網友還批評她工作態度散漫，阿Sa說：「都叫有人討論，總好過冇人理，自己拍得好辛苦，真心講農夫好偉大，同強哥（豬農）大家有聯絡。」其後她再為只顧補妝及搽花露水一事解釋說：「補妝係因為劈竹整到啲碎入眼，唔通唔抹咩？而花露水唔係我用，係工作人員用嚟驅蚊。」
阿Sa越說越激動，此時語氣開始帶點憤怒，她說：「唔可以話自己冇錯，但真係好唔開心，拍呢個節目，自己都完全冇收錢，只係想去體驗，我唔係收咗錢而拍得唔專業，我從來唔覺得自己工作唔專業，公司都有打畀TVB反映，希望遲啲出碟可以出長啲個過程，今次嘅真人騷只係想流露自己嘅真性情。」面對外間批評之聲不絕，問阿Sa再拍此類節目會否繼續流露真性情？她說：「未必會，之前同Mani（阿Sa經理人）傾過，覺得自己今次咁拍唔係咁work，下次再有機會會掩飾番自己。」
提到節目中有一段指她踩屎後嘴藐藐，阿Sa說：「相信冇人踩到屎會feelhappy。」另外，對於被指不肯食豬糧及對Steven沒同情心，阿Sa說：「啲豬糧係粟米粒，不過喺食之前，隻手摸完豬再摸食物，覺得唔衞生。話對Steven冇同情心？知唔知佢走咗4個鐘，都係得我一個人做嘢，好多嘢大家都睇唔到。」問阿Sa覺得外間的批評對她是否有影響？她說：「呢件事係我今年最唔開心嘅事，平時唔開心嘅事唔多，今次件事比較嚴重，好彩我個人比較樂觀。」
致電安撫
監製堅稱阿Sa有錢收
對於阿Sa的不滿，無綫監製霍澤基昨在電話中回應說：「阿Sa唔會冇錢收，公司有騷錢計番畀佢，當然騷錢同佢拍電影係冇得比啦。我覺得節目出到嚟阿Sa好可愛，真人騷反映真實事情，阿Sa係細路女，未去過豬場，覺得好臭都係好正常。其實有好多播唔晒嘅片段，觀眾可以上tvb.com睇。不過既然阿Sa咁講，我都會打電話安撫吓佢，我覺得今次佢拍呢個節目辛苦啲都係值得，而且收視都唔錯。」
採訪：張俊銘
攝影：陳偉權
一網講盡：網友狠批練精學懶
蔡卓妍主演的節目《阿Sa真人Show》首播後，其直率表現受盡網友批評，似乎要想辦法補救大跌的人氣了。
oneworm：直頭係練精學懶，乜嘢都畀晒個男仔做，又唔受得氣。
alvinchong：寧願切親隻手……一個字……服！
音符：阿Sa咁講嘢真係好過份囉，做少少嘢都畀晒Steven做，喺緊急關頭先嚟掛住Steven，當人水泡咩？
kk5354：我以前都好鍾意Twins，尤其阿Sa，睇完之後係對佢改觀，不知所謂。
1218：我覺得阿Sa好唔認真……verybad……
小k：有時迫Steven做嘢，又好似過份咗少少。
資料來源：香港討論區
話你知：明抄ParisHilton
今次由阿Sa擔正的《阿Sa真人Show》，要阿Sa落手落腳養豬湊仔體驗生活，惹來不少迴響，其實該節目絕對有抄襲之嫌，與美國女星兼富家女ParisHilton及其好友NicoleRichie齊拍的真人騷節目《TheSimpleLife》極度相似。
《TheSimpleLife》於03年在美國首播後大受歡迎，現時已拍至第五季，節目不斷安排兩人到窮鄉僻壤，做盡最艱辛的工作，例如養牛、湊仔及掘墓地等，搞笑在於兩人的無知及雞手鴨腳表現，往往穿着一身名牌勞動，效果爆笑。