西貢黃先生推介恒地（012），建議74蚊買入，目標睇90蚊，揸3個月，看升兩成一，「恒地近排走勢幾好，啱啱重組完，注入埋煤氣（003），見佢高位回一回，咪趁機追入。」
英皇證券研究部主管沈振盈表示，「𠵱家恒地股價處於高位，近日部份龍頭地產股長實（001）同新地（016）已跌緊，恒地難免會回吐。」早排恒地獲大行報告唱好，以內地房產股估值，重新評估擁有大量大陸土儲嘅恒地，加埋減息刺激，令恒地股價急升。他認為：「恒地短炒冇問題，我個人對本地樓市睇法較保守，估計最多再升一浸，而內地樓市受政策影響，只會向下調。」
黃生疑惑，「乜減息唔係對地產股好咩？嚟緊仲會減息噃！」沈振盈指：「唔係睇淡二手樓買賣，講嘅係一手樓，地產商主要賣豪宅，豪宅嘅樓價靠大陸資金支撐，家陣中央收緊銀根，豪宅仲有承接力咩？」
風水角度 樓市有震盪
早排沈振盈喺電台以風水角度睇淡樓市，黃生好奇追問，沈振盈就話：「用風水睇係唔好，出年係戊子年，用立春八字睇，有木剋土現象，對樓市有震盪，不過，都要睇埋基本因素。」黃生追問：「咁出年係咪都唔睇好地產股，要見好就收？」沈振盈坦白講：「係！」沈振盈話：「今年同出年一樣，都係木剋土。」佢見同黃生咁有緣，再提點一句，「供求關係，要全面睇，唔可以只聽地產佬片面之言。」
明年旺金火 買電訊股
黃生最後問：「單以風水睇，出年買邊個行業着數啲？」沈振盈話：「明年屬火屬金會好，四叔都有講過，不過冇指明買啲乜。」他指：「屬火可以買電訊股，吼中電信（728），屬金就睇資源商品，但要等調整先好買，可吸紫金（2899）同江西銅（358）。」黃生好奇：「咁銀行股算唔算金？」沈振盈補充：「係，但要等過咗立春，（明年）2月4號先好買。」
恒發（097）
業務零碎難保增長
荃灣Shering話自己前日買咗恒基發展（097）：「佢本來值17個幾，但係之後拆細同除淨，我喺1.64元買到。」孫柏文及沈大師都非常好奇Shering點解會有呢個投資舉動，孫柏文問Shering，除淨之後，恒發仲有咩留低？Shering話：「我上網睇佢公司有派息紀錄。」
沈大師不忘解釋：「其實之前四叔想私有化佢，但係一直私有化唔到，因為唔肯畀現金要畀股票。最後就移花接木，逐件資產去買，最近通過咗股東會，收購咗佢持有嘅煤氣股份，所以恒發股東可以拎到現金同恒地股票。」
沈大師又認為，恒發現有嘅業務太零碎，唔足以維持公司增長，而且過往嘅派息紀錄唔可以作為參考，因為恒發已經冇咗煤氣派番嚟嘅利息，所以奉勸Shering要「小心此股」。
九倉（004）
雙頂令人不安
北角阿Ben推介九倉（004），認為呢排地產股強勢，佢又積極喺內地吸納土儲，又係瑞銀陸東嘅心水股，相信九倉長遠有作為，建議44蚊買入，目標價55蚊。不過沈大師睇圖後就有啲憂慮：「佢個雙頂真係令人好不安。」但阿Ben話，「佢應該可以衝破個雙頂後再向上。」
沈大師話佢一直炒唔起必有原因，「可能係投資者對管理層有啲睇法。九倉一向被人反應慢嘅感覺，對個市嘅觸覺成日都錯，臨水尾先嚟做嘢，呢次佢只係跟地產股升追落後。」沈大師語帶雙關笑謂：「內地樓市未來一兩年一定落，九倉呢排咁積極進軍大陸，真係好得人驚呀！」
新地（016）
大價股唔值博
呢排新地（016）表現大勇，不斷有網友推介，連西貢Peter噚日都打上嚟話睇好新地，因為佢喺國內有合營項目，近幾個月地產股又係一個穩定投資，想喺人哋windowdressing前（基金年底粉飾櫥窗）搵些少。
沈振盈指出，「Peter定價方面有問題，止蝕位只係同買入價相差2蚊，以一隻股價150、160蚊嘅股份嚟講，2蚊可能眨下眼已經無咗。」值博率亦一樣，大銀碼股份，一出一入使費都成蚊，若只係賺佢6、7蚊，亦唔係好夠。若果係買新地輪又唔同咁講，𠵱家就好似欠缺咗啲嘢。
Peter建議
建議買入價：$157
目標價：$164
止蝕價：$155
時間：年底前
今日嘉賓：英皇證券研究部主管沈振盈
每日收市後4:30pm
歡迎Phonein28698262
http://appleactionews.com/features/finance/
想搵名家教路，請登入以下網址
http://appledaily.atnext.com/jp/finance登記
成功參與節目者，有機會獲贈禮品
＊以webcam參與節目者，可額外獲贈KFC$200現金券