乜嘢叫做一沉百踩，睇吓美國家吓嘅國運就知。好似噚日咁，日本管理大師大前研一應貿發局邀請，出席噚日國際貿易經濟論壇，分享吓佢對未來世界嘅前瞻睇法。美國佬不斷要求中國政府將人民幣升值，席間大前研一就教中國政府點樣對付美國佬。
大師話，日本早年經濟迅速發展，美國佬當時亦成日話日本貨成本偏低，日圓價值偏低，要求日圓升值，所以中國對美國嘅指摘最緊要唔好反應過敏，反正你講乜，班美國政客都唔會收口，所以就等佢哋自己講個夠。
大師仲話，查實講到尾最緊要係美國仍然做到生意、有錢賺，美國消費者比班政客聰明得多！
同一場合，政府經濟顧問郭國全亦都加把嘴，揶揄吓美國佬。郭國全話：「美國成日話中國貨有毒，不過美國亦唔見好得去邊，將啲有毒嘅金融產品輸出畀全球，搞到𠵱家全球金融動盪！」