噚晚，5間央行宣佈新嘅「推錢入銀行體制」救市計劃。原因係啲銀行寧願借唔到錢，都唔想去啲央行嘅「緊急借錢處」discountwindow借錢。理由係如果俾人哋知間銀行要去「緊急借錢處」借錢，就會令人覺得間銀行唔掂。
即係有如孫柏文走去當舖，俾老竇見到，佢一定問我：「呢排係咪輸咗好多？」所以今時今日，我要做個人融資活動時，會望落「好正常」咁，去啲銀行做「私人貸款」。
睇落冇咁尷尬
基本上，做嘅嘢一樣，不過睇落冇咁尷尬。噚晚5間央行宣佈嘅新計劃，就係知啲銀行懶要面，唔肯去央行嘅當舖。所以就推出咗呢個叫做termauctionfacility嘅「私人貸款」。
啲銀行會唔會借？咁我就要問問你，你覺得借「私人貸款」O唔OK？
美國熊市正式揭幕
噚日凌晨時分，花旗國聯儲局開會減息0.25%。「減息？好！」一向以嚟都係填鴨式（投資）教育嘅標準答案。不過噚日凌晨，一宣佈減幅，花旗國股市即刻跌你三百幾點。孫柏文覺得，個股市有如唔夠糖食嘅小朋友，喺度扭計。
唔夠糖食扭計
當然，大家可能覺得，噚日凌晨金融系統嘅「反應」，唔係個扭計小朋友，而係唔夠藥嘅癌病人，喺度嘔血。點都好，現實係聯儲局「發功」時，個市居然跌。聯儲局除咗加大力度，已冇板斧。即係話，除非基本經濟改善，否則股市唔會升，因為從噚日開始，聯儲局為股市提供嘅影響，只會係「負面」。亦即噚日凌晨，花旗國熊市正式揭幕。
金手指網誌： http://phatdat.blogspot.com