自從賣咗一手創辦嘅PEOPLES萬眾電話畀中移動（941）後，雄爺梁啓雄除咗同寶貝女，及手帕交李國寶齊齊捲入道瓊斯內幕交易案單嘢比較轟動外，好似冇晒聲氣。查實佢不知幾忙，抱完外孫最近又抱內孫。仲有，兩個仔搞檔TopSecret又做得唔錯，噚日仲喺朗豪坊開第7間分店，但華華覺得令佢最happy嘅，應該係同寶哥哥情未變！
出名好中氣嘅雄爺話：「單嘢仲未完，真係咩都唔講得，就快喇（講單嘢就快完），相信冇事，好快就可以同你食飯。」係嘅，講大咗又俾啲美國佬將軍就唔好啦。至於問佢同寶哥哥友情有冇受事件考驗，雄爺話呢排最好都係唔好提李生住。不過，唔經佢把口講唔緊要，反正有事實證明兩位仲係friend底。
東亞高層出席開幕禮
好似賣2in1女士運動裝（即係運動衫內置Bra）嘅TopSecret，係雄爺家族生意，但寶哥哥佔十幾巴仙股份，就連噚日第7間新舖，都開正喺東亞隔籬。點解咁啱？雄爺話：「呢啲咪緣份囉！以前呢個位係Citibank租嘅，後尾佢哋投訴唔夠東亞搶生意，所以唔租。」咁係咪李生幫你租呢度㗎？「我哋自己租㗎。」
Well，噚日呢個簡單而隆重嘅開幕典禮，細股東寶哥哥noshow，但就有唔少東亞中高層畀面，咁李梁兩位嘅關係如何，心照啦。
講番雄爺轉行賣勁有承托力嘅絕世好Bra，華華最欣賞唔係啲衫嘅承托力，反而係佢對兩位公子嘅栽培，同埋幫夕陽到爆燈嘅香港製衣業畫上一道彩虹。事關佢啲衫喺葵芳間廠，由工人handmade，每日限量生產。
製衣起家嘅雄爺話：「兩個仔都係律師，話想試吓做生意，咪幫佢哋囉，遲啲喺塞班間廠都會轉做TopSecret嘅產品，plan咗出年喺紐約同洛杉磯開舖，最緊要係班工人有嘢撈。」睇怕雄爺除咗係模範僱主，仲係絕世好爸！
李國寶道瓊斯內幕交易案事件簿
日期：08/05
事件：新聞集團有意收購道瓊斯，梁家安夫婦被揭發向父親梁啓雄借了約300萬美元，偷步買賣道瓊斯股份，獲利6000多萬港元
日期：10/05
事件：李國寶身為道瓊斯董事之一，被指與梁啓雄關係密切，成為梁家安夫婦知悉新聞集團收購道瓊斯的「可能途徑」
日期：17/07
事件：李國寶被指違反美國當地證券法，美國證監會人員建議美國證監會提出民事訴訟
日期：20/07
事件：李國寶否認指控
日期：25/07
事件：李國寶表示不會因為道瓊斯案而辭去道瓊斯董事職位
日期：04/09
事件：有傳美國證監會建議李國寶支付400萬美元，以及停任美國上市公司董事作和解
日期：25/10
事件：再度傳出李國寶就道瓊斯內幕交易案與美國證監會和解
日期：31/10
事件：李國寶否認和解傳聞
日期：13/11
事件：有傳李國寶於道瓊斯內幕交易案已脫險
兩老友齊踢美國佬走
梁啓雄同李國寶情緣有幾深？梁啓雄檔TopSecret唔止新店揀咗喺朗豪坊，舖位喺正寶哥哥檔東亞銀行隔籬，兩人仲齊齊同美國人交手。
話說TopSecret個舖位上手係花旗銀行，梁啓雄踢走花旗國老牌銀行之餘，更計劃下年7月進軍花旗國，喺紐約同洛杉磯開枝散葉，實行賺美金。無獨有偶，寶哥哥喺美國道瓊斯單官司，據聞亦同美國證監會和解咗。
不過咁，梁啓雄今次奪得朗豪坊呢個舖位，其實都係時機配合，呢啲可能就係緣份。話說鷹君（041）旗下嘅朗豪坊，10月時重組過啲商舖，將各樓層劃分唔同主題，又加多咗最潮嘅新店好似H&M、D-mop等，而TopSecret就喺呢個時候進場。
電郵：mailto:[email protected]