恒隆地產（101）主席朗尼陳啓宗一向敢言，而且教訓人從來唔使畀面。好似噚日貿發局搞嘅CEO論壇，波司登（3998）主席高德康就「不幸」要硬接朗尼陳嘅「訓示」。
話說論壇期間，有位觀眾問到點樣睇企業社會責任呢個潮流。高德康當仁不讓，率先話捐咗成億銀幫鄉親老弱。點知朗尼陳聽完高主席嘅慷慨，就話對呢個做法好有保留，佢認為股東個人捐錢多多都冇問題，至於企業捐一啲錢亦可以締造和諧，不過捐得太多就變相成為另類不透明嘅稅務，同企業本質定位有差異。
畀朗尼陳兜口兜面訓示，高主席即時平反，再三澄清所講嘅捐款，全係私人捐出，唔係公司畀錢。不過，朗尼陳似乎意猶未盡，事後同記者講，上個禮拜五，國內某位市長就要求佢捐錢，朗尼陳當然冇答應，向對方大耍太極之餘，佢話，擔心呢個苗頭正喺國內滋長。