炒股票高價入市坐艇，散戶最鍾意越跌越溝，當然係咪越溝越跌，華華唔敢多講。不過，除咗炒股有人溝貨，原來買樓都有人溝貨，而且呢個仲係成功個案。
華華噚日收到個地產經紀報料，佢話藍田滙景花園啱啱有單自製相連戶成交，原業主成功溝貨賺錢離場。不過，佢係用一件90年低價貨，溝一件98年高價貨。高位唔走仲攬多件貴價貨打通，好彩近排個市好似食咗K仔咁high到震，佢先可以用個近年新高呎價賣出套相連單位，一件賺到開巷，另一件輸少當贏。
報料嘅經紀話，滙景花園13座中層E同埋F室，面積分別910同913呎，加埋即係1823呎，賣咗1238萬銀，即係呎價6791銀。F室喺90年樓花價170萬銀買入，呎價只不過1862蚊，業主8年後用貴3倍嘅價錢692萬銀，買埋隔籬個E室，呎價成7604銀。
兩件貨溝埋賬面成本862萬，唔計雜費、利息同機會成本，賺咗376萬銀。