小記家住元朗，每逢老媽子懶得煮飯，元朗大榮華必是心水飯堂之一。不過，自從食神梁文韜紅到發紫，人龍變得水蛇春咁長，來自港九新界的為食鬼，山長水遠撲入元朗等食圍村菜。咪以為圍村菜就等於食盆菜，韜韜話最原始、最傳統的盆菜，其實屬於粗嘢，請你「食九碗」（即九大簋）才是最矜貴的。韜韜又有古仔講：「以前屏山鄧氏家族（即鄧達智的那個家族）等大戶人家，極少吃盆菜，只吃『兩四缽』，意指兩個大碟及四個大碗，兩碟是盛放豬肉、門鱔亁、蘿蔔、魷魚、豬皮等材料，而四缽則是較高級的食材，如切雞、燒鴨、薑葱蠔、釀鯪魚等，兩碟與四缽食材味道不相配，有錢人識食，會把食物分開吃。邊似得我哋𠵱家咁鮑參翅肚雞鴨鵝撈埋一盆。」大榮華的九大簋充滿圍村原始風味，而且仲好抵食，九大碟菜式包括香荽燒米鴨、圍頭五味雞、白水浸烏頭、盆菜豬肉、陳皮豆豉爆蝦、椰菜絲炒長遠、時菜鯪魚球、蠔油燜冬菇及甜酸肉青，加送缽仔蒸飯及奶黃馬拉糕，夠餵飽一圍人，只需$880。幾丁友食唔晒？放心，九大簋中有不少都是餐牌上的熱門菜式，散叫一樣有得嘆﹗
記者：盧家蕙
攝影：陳陶鈞
盆菜豬肉
豬肉夾雜肥膏，鬆化而不黐牙，以芋頭墊底，吸收了豬肉及醬汁，不吃不可。
奶黃馬拉糕
熱騰騰的馬拉糕，兩層的奶黃甜而不漏，糕香四溢，不少食客都愛打包一兩底返屋企。
缽仔蒸飯
以絲苗米原缽濕蒸，飯粒亁身有咬口，落一匙羮豉油及半匙羮豬油拌吃，甘香到不得了！
大榮華酒樓（24769888）
地址：元朗安寧路2-6號2樓
