由導演王家衛拍嘅戲同佢講嘅嘢，都知佢係一個有性格嘅人。噚日佢喺尖沙嘴文化中心，接受香港公開大學頒發嘅榮譽社會科學博士學位，佢太太、張同祖同埋甘國亮現身支持。
得校董會批准
王家衛上台接受校長梁智仁頒授學位時，仍然戴住佢嘅招牌黑超。事後訪問時，王家衛解釋話有原因：「我想補充咁樣唔係冇禮貌，事前我都同咗校董會講咗，今次頒個學位畀王家衛呢個角色，眼鏡係我生涯其中一部份，並唔係要保持形象，呢個係我工作習慣，想保留番。」
未讀完大學就入TVB訓練班嘅王家衛，好支持香港有遙距課程，佢話：「好榮幸得到呢個學位，我當時讀到大學二年級就入咗訓練班，中途放棄冇讀。如果年輕人有自己想做嘅，可以果斷去做。最重要知自己要做乜嘢，就算兩年後再讀番書都冇問題。」